Tamaat isigalugu: Mittarfiliornissamik suliniutissaq ukiuni 10-ni oqallisigineqareerluni piariilersoq
Siullermik saqqummersinneqarpoq juunip sisamaani 2018-imi, marsillu arfernani 2019-imi nutarterneqarluni.
Mittarfiit aaqqissugaanerat nutaaq nunatsinni attaveqarnikkut aningaasaliinerit akisunersaraat.
Mittarfiit pillugit suliaq 2009-mili aallartippoq, taamanili suliniutaasoq piffissap ilaani mittarfinnik tallimanik imaqarluni. Ukiut qulingiluat maannamut ingerlareerput suliniullu mittarfinnik pingasunik imaqarpoq.
- Nuummi Ilulissanilu mittarfiit 2200 meterinut tallineqassapput, atlantiku qulaallugu timmisartuussinermi mittarfittut atorneqarsinnaanngortillugit.
- Qaqortumi nunap immikkoortuani mittarfimmik meterinik 1500-nik takissusilimmik sanaartortoqassaaq.
- Mittarfiit pingasuusut 3,6 milliardit koruunit missaannik akeqassangatinneqarput.
Taamanimit maannamut pisut arlallit ataani allaaserineqarput:
Marsip arfernani 2019
Kim Kielsenip Lars Løkke Rasmussenillu Nuummi Ilulissanilu mittarfiit tallineqarnissaannut Danmarkip aningaasaleeqataanissaa pillugu isumaqatigiissut atsioqatigiissutigaat. Isumaqatigiissuteqarnermi Danmark mittarfiliornermik suliniutinut 700 millionit koruuninik aningaasaliissuteqarluni Kalaallit Airports International A/S-ip 33 procentianik piginneqataalissaaq.
AAMMA ATUARUK Danmarkip mittarfiliassanut aningaasaleeqataanissaa inaarutaasumik atsioqatigiissutigineqartoq
Novembarip 15-iani 2018
Mittarfiliortiternissamik pilersaarutit Inatsisartuni akuersissutigineqarput. 18-it akuersipput, qulingiluat itigartitsisut marlullu taaseqataanatik. Akuersissutigineqarnerat Nuummi Qaqortumilu nuannannermik qummoroortarnermillu nallittorsiutigineqarpoq.
AAMMA ATUARUK Mittarfinnut pilersaarut akuerineqarpoq
AAMMA ATUARUK Mittarfinnut pilersaarut pillugu ilisimasaqarnerulerit
Novembarip 11-iani 14-ianilu 2018
Mittarfiliortiternissamik pilersaarutinut akuersissutigineqartussanngortunut akerliussutsimik takutitsinerit Kangerlussuarmi, Sisimiuni, Kangaamiuni, Narsarsuarmi Narsamilu ingerlanneqarput. Mittarfiliassanut tapersersuilluni Qaqortumi aamma takutitsisoqarpoq.
AAMMA ATUARUK Mittarfiit pillugit ingerlaaqatigiinnermik takutitsisorpassuusut
AAMMA ATUARUK Mittarfiit pillugit isumaqataasut isumaqataanngitsullu tunngavilersuutaat aajuku
Novembarip aallaqqaataani 2018
Mittarfiliortiternissamik pilersaarutit Inatsisartuni aappassaaneerneqarput ataatsimiiititaliamilu suliassanngorlugit naalakkersuisoqatigiinnit Demokraatiniillu ingerlateqqinneqarlutik.
AAMMA ATUARUK Naalakkersuisoqatigiit Demokraatillu Mittarfiliortiternissamik suliaq ingerlateqqeqquaat
Septembarip qulingani 2018
Naalakkersuisut siulittaasuata Kim Kielsenip danskillu ministeriunerata Lars Løkke Rasmussenip Danmarkip mittarfiliortiternissamut aningaasaleeqataanissaa pillugu nalunaarut atsioqatigiissutigaat. Nuummi Ilulissanilu mittarfiliortiternernut Danmarkip 700 millionit koruuninik aningaasaliinissaa isumaqatigiissummi neriorsuutigineqarpoq. Aammattaaq katillugit 900 millionit koruuninik akikitsumik taarsigassarsititsinissaq Danmarkip qulakkeerumavaa. Taamatullu pisoqarnerata aqaguani Partii Naleraq naalakkersuisooqataajunnaarpoq, ilaatigut Danmarkip mittarfiliortiternermut oqaasissaqaqataalersinnaanerata akueriumaneqannginnera pissutigalugu. Nuummi Nuutoqqami isumaqatigiissutip atsioqatigiissutigineqarnerani allagartarsualisarluni nilliallunilu akerliussutsimik takutitsisoqarpoq.
AAMMA ATUARUK Løkke Nuummi Ilulissanilu mittarfinnik piginneqataarusuttoq
AAMMA ATUARUK Det mener partierne om dansk medfinansiering af lufthavnene
AAMMA ATUARUK Qinnuuloortunngortippaatigut
Maajip 28-ani 2018
Nuummi, Ilulissani Qaqortumilu mittarfiit pingasut aningaasalersorneqarnissaannut sanaartorneqarnissaannullu sinaakkutissat pillugit inatsisissatut siunnersuut Inatsisartuni siullermeerneqarpoq. Sivisuupilussuarmik oqallisigineqareersoq siunnersuut Inatsisartut Aningaasaqarnermut Akileraartarnermullu ataatsimiititaliaannut suliassanngortinneqarluni ingerlateqqinneqarpoq.
AAMMA ATUARUK Inatsisartut mittarfiliortiternissamut suliaq pingaaruteqartoq siullermeeraat
- Mittarfiit aningaasalersorneqarnissaannut sanaartorneqarnissaannullu sinaakkutissat pillugit inatsisissatut siunnersuut Inatsisartuni aappassaaneerneqarlunilu pingajussaaneerneqassaaq.
- Kalaallit Airports mittarfiit sanaartorneqarnissaannut neqeroortitsissaaq.
- Nuummi mittarfiup sanaartorneqarnera siulliunneqassaaq 2018-imilu ukiakkut aallartinneqarnissaa naatsorsuutigineqarpoq.
- Qaqortumi mittarfiup inissisimaffissaanik misissuinerit nutaat ingerlanneqassapput.
- Piffissamut pilersaarut malillugu mittarfiit pingasut 2022-mi atuutilernissaat naatsorsuutigineqarpoq.
Maajip 25-ani 2018
Attaveqaqatigiinnermut naalakkersuisoq, Simon Simonsen, mittarfiliortiternerit pillugit isumasioqatigiinnissamut Inatsisartuni ilaasortat Naalakkersuisullu qaaqquai. Politikerit Naalakkersuisoqarfimmit, Kalaallit Airportsimit, Mittarfeqarfinnit Deloittemillu aningaasalersuinissaq sanaartornissarlu pillugit inatsisissatut siunnersuutip suliarinissaanut piareersarneqarput.
Maajip 17-iani 2018
Mittarfiit nutaat pingasut illutassaasa ilusilersornissaannut illuliassanik titartaasartunik unammisitsinermi ajugaasut Kalaallit Airportsip avammut saqqummiuppai.
AAMMA ATUARUK Mittarfiit nutaat ima isikkoqalissapput
Apriilip 20-ani 2018
Inuiaqatigiit aningaasaqarnerannut sunniutissat pillugit misissueqqissaarnerup immikkoortuata aappaa Attaveqaqatigiinnermut naalakkersuisoqarfiup avammut saqqummiuppaa.
Mittarfiit pingasut sanaartorneqarnerisigut annertuumik sipaaruteqartoqarsinnaanera misissueqqissaarnermi inerniliunneqarpoq. Aningaasaqarnermut Siunnersuisoqatigiit misissueqqissaarnermi inerniliunneqartut pillugit kingorna arlalinnit apeqqusiipput.
AAMMA ATUARUK Mittarfiliortiternerit nutaat milliard koruuninik sipaaruteqarfiussasut missueqqissaarnermi inerniliunneqarpoq
AAMMA ATUARUK Mittarfissuaqalerpat nunaqarfiit inuerutiimissasut
AAMMA ATUARUK Mittarfiliorneq pioreersunilluunniit atuiinnarneq aningaasaqarnermut assigiippoq
Apriilip 12-iani 2018
Inuiaqatigiit aningaasaqarnerannut sunniutissat pillugit misissueqqissaarneq, mittarfiillu pingasut sanaartornissaannut aningaasalersornissaannut sinaakkutissat pillugit inatsisissatut siunnersuutip tusarniaassutigineqarnerani akissutigineqartut, KNR-ip allagaatinik takunnikkumalluni noqqaassuteqarnermigut pissarsiarai. Misissueqqissaarnermi atuarneqarsinnaavoq mittarfiit maanna piusut pigiinnarlugit ineriartortinneqarnerinut taarsiullugu nutaanik mittarfiliornikkut Nunatta karsia aningaasanik sipaaruteqassasoq. Tamatumunngalu peqatigitillugu Kangerlussuarmi Narsarsuarmilu mittarfiit qulimiguulinnut mittarfinngortinneqarnissaat misissueqqissaarnermi tunngavigineqarpoq.
AAMMA ATUARUK Mittarfittaassat 165 millioninik sipaaruteqartitsissasut
AAMMA ATUARUK Kangerlussuaq Narsarsuarlu misissuinermi nutaami qumariartorput
Marsip 27-ani 2018
Kalaallit Airportsip mittarfiit nutaat pingasut sanaartornissaannut neqerooruteqartussatut entreprenørit assigiinngitsut arfinillit toqqarpaat.
AAMMA ATUARUK Mittarfiliornissamut sanaartortussat toqqarneqartut
Januaarip 15-iani 2018
Mittarfiit pingasut sanaartornissaannut aningaasalersornissaannullu sinaakkutissat pillugit inatsisissatut siunnersuut Naalakkersuisunit tusarniaassutigineqalerpoq.
AAMMA ATUARUK Mittarfiit amigartoorutaat akitsuusersuinikkut aningaasalersorneqassapput
AAMMA ATUARUK Professorip mittarfik pillugu paasissutissat ujartorai
Novembarip 20-ani 2017
2018-imut aningaasanut inatsit, mittarfiit aningaasalersorneqarnissaat pillugu oqaasertaliussanik imaqartoq, Inatsisartunit akuersissutigineqarpoq.
AAMMA ATUARUK Naalakkersuisut 2,1 milliardit koruunit mittarfinnut aningaasaliissutiginiaraat
AAMMA ATUARUK Mittarfiliassat aningaasanut inatsit pissutigalugu kinguartinneqartut
Novembarip 20-ani 2017
Inatsit mittarfiit nutaat sanaartorneqarnerini sulisut kommuninut akileraarnatik Nunatta karsianut akileraartarnissaannik qulakkeerinnittussaq Inatsisartunit akuersissutigineqarpoq. Avataanit suliartortunit akileraarutitigut isertitat tamarmik taamaaliornikkut mittarfiit aningaasalersornissaannut atorneqarsinnaanngorput.
AAMMA ATUARUK Inatsit tuaviortup mittarfiit aningaasalerneqarnissaat qulakkiissagaa
AAMMA ATUARUK Ataatsimiititaliap Naalakkersuisut inatsisaat tuaviuussaq avoqqaaralugulu akuerigaa
Novembari 2017
Kalaallit Airportsip Nuummi Ilulissanilu mittarfinnik meterinik 2200-nik takitigisunik Qaqortumilu meterinik 1500-nik takitigisumik sanaartornissamut suliniutit aallartisarnissaannut Naalakkersuisunit Inatsisartullu Aningaasaqarnermut Akileraartarnermullu ataatsimiititaliaannit akuerineqarpoq.
Oktobarip qulingiluaani 2017
Kalaallit Airportsip mittarfiit pillugit suliniutinut aningaasalersuinissamut siunnersortissatut Danske Bank toqqarpaa.
AAMMA ATUARUK Danske Bank mittarfiliornissamut aningaasaliisussarsioqataassaaq
Aggustip qulingiluaani 2017
Mittarfiliortiternerit pillugit tamakkiisumik siunnersortissatut Cowi Kalaallit Airportsimit toqqarneqarpoq.
AAMMA ATUARUK Kalaallit Airports sanaartugassanik pilersaarusiortutut tamaginnut siunnersortissarsisoq
Juulip aallaqqaataani 2016
Ingerlatseqatigiiffik Kalaallit Airports Naalakkersuisunit pilersinneqarpoq, ingerlatseqatigiiffik Nuummi, Ilulissani Qaqortumilu mittarfinnik sanaartorlunilu, piginnittuullunilu ingerlatsissaaq. (Aalajangiineq Inatsisartut Aningaasaqarnermut Akileraartarnermullu ataatsimiititaliaanit akuerineqarpoq).
AAMMA ATUARUK Mittarfilioqatigiittussanut aningaasaliissutissat akuersissutigineqarput
Decembarip aappaani 2015
Naalakkersuisut Inatsisartut 2015-imi ukiaanerani ataatsimiinneranni Nuummi Ilulissanilu mittarfiit tallilerneqarnissaannik kiisalu Qaqortumi, Tasiilami Ittoqqortoormiinilu mittarfiliornissamik suliakkerneqarput.
AAMMA ATUARUK Mittarfiit pillugit pilersaarut akuersissutigineqarpoq
Kingorna mittarfiit pillugit sulinermi Tunumi mittarfissat peerneqarput.
Apriilip arfineq-pingajuani 2011
Assartuussineq pillugu isumalioqatigiissitap inassuteqaatini saqqummiuppai. Ilaatigut Kangerlussuarmi atlantiku qulaallugu timmisartuussinernut mittarfiup Nuummut nuunneqarnissaa pineqarpoq.
AAMMA ATUARUK Transportkommission: Flyt Kangerlussuaq til Nuuk
Ukiakkut 2009
Naalakkersuisut assartuussineq pillugu isumalioqatigiissitamik pilersitsipput, nunatsinni assartuussinerup attaveqarnerullu iluani siunissami periarfissanik misissuisussamik.
AAMMA ATUARUK Assartuinermut ataatsimiititaliaq pilersinneqassaaq
