Misissuineq: Mittarfissuaqalerpat nunaqarfiit inuerutiimissasut
Nuummi Ilulissanilu mittarfissuaqalerpat taamatuttaaq Qaqortumik mittarfittaarpat nunatta ukiut 25-t ingerlanerini 1.3 milliardit koruunit missaat sipaassavaat.
Taamaattoqassappalli Kangerlussuarmi Narsarsuarmilu mittarfissuit atorunnaartariaqarput qulimiguulinnut mittarfinngortariaqarput.
Mittarfissat inuiaqatigiinnut aningaasatigut kingunissaat pillugit misissueqqissaarnerup Deloittemit suliarineqartup taama inerniliivoq.
AAMMA ATUARUK Mittarfiliortiternerit nutaat milliard koruuninik sipaaruteqarfiussasut missueqqissaarnermi inerniliunneqarpoq
Taakkunanili mittarfissuit atorunnaarlutik qulimiguulinnut mittarfinngorpata kinguneqarnerlussaaq.
Kangerlussuarmi najugallit 500-t missaanniipput Narsarsuarmi 140-t missaanniittut. Taakkunanilu najugallit amerlanersaat mittarfinni, mittarfinnulluunniit attuumassuteqartuni, soorlu akunnittarfinni suliffeqartuupput.
AAMMA ATUARUK Mittarfiliortiternerit pillugit misissueqqissaarineq nutaaq saqqummiunneqartoq
Qulimiguulinnullu mittarfinngussappat suliffiit taakku atorunnaassasut misissueqqissaarnerup takutippaa.
- Kangerlussuarmi Narsarsuarmilu najugallit aningaasarsiorfitsik atorunnaarpata taamaalillutik allanut nuunnissaat ilimanaateqarpoq, misissueqqissaarnermi allassimavoq.
Najugaqartullu nuunnissaannut aningaasanik 30 millionit koruuninik atuisoqarnissaa naatsorsuutigineqarpoq, ilaatigut inissaqarniarnissamut atugassanik.
AAMMA ATUARUK Kangerlussuaq Narsarsuarlu misissuinermi nutaami qumariartorput
Kangerlussuarmi mittarfiup 1.500 meterinik takissuseqartumik mittarfiulernissaa misissueqqissaarnermi aamma naatsorsorneqarsimavoq. Tassani 500 millionit koruuninik aningaasaliiffigineqarnissaa naatsorsorneqarluni, taamaalilluni inuiaqatigiit mittarfissualiornikkut sipaarfissaat ikileriaateqassallutik.
Kangerlussuup atuutiinnarnissaanut amigartoorutaasussat matussuserneqassasut Siumumit piareersimaffigineqartoq Siumup siulittaasuata Kim Kielsenip oqaatigereerpaa. Kangerlussuarmili mittarfiup qanoq atorneqarnissaa oqariartuutigineqarani.
AAMMA ATUARUK Mittarfittaassat 165 millioninik sipaaruteqartitsissasut
AAMMA ATUARUK Kangerlussuarmi amigartoorutit Kielsenip matussuserusuppai
AAMMA ATUARUK Kangerlussuaq takornariaqarfiulluartartoq umiarsualivittaassaaq
AAMMA ATUARUK Kangerlussuarmi umiarsualivik takornarianut iluaqutaassaaq
