Kangerlussuaq Narsarsuarlu misissuinermi nutaami qumariartorput
Mittarfiliortiternerit nunatta karsianut aningaasatigut kingunerisassaat pillugit nalunaarusiap siunnersuisarfiup Deloittep Namminersorlutik Oqartussat sinnerlugit suliarisimasaata KNR-illu allagaatinik takunnikkumanermigut pissarsiarisimasaata immikkoortuani siullermi tamanna paasinarsivoq.
Nuummi Ilulissanilu mittarfissuit pilersinneqassappata, Kangerlussuarmi Narsarsuarlmilu suliassakinnerulissapput. Tamanna ilaatigut isumaqarpoq Kangerlussuarmi mittarfik 1199 meterimut naalineqassasoq.
Mittarfissuarnik nutaanik marlunnik sanaartornikkut angallannikkut aaqqissuussinermut sipaarutissatut Namminersorlutik Oqartussat naatsorsuutigisaasa kingunerissavaat nunatsinni maanna mittarfissuit pioreersut, Kangerlussuaq aamma Narsarsuaq, nunanut allanut isaavittut inissisimajunnaarnerat.
AAMMA ATUARUK Mittarfittaassat 165 millioninik sipaaruteqartitsissasut
Nalunaarusiami misissueqqissaarinerup takutippaa Kangerlussuup imarpik ikaarlugu mittarfittut inissisimajunnaarnera Mittarfeqarfinnut ukiumut 87 millionit koruuninik akeqassasoq.
Mittarfiit pillugit misissuineq suliap aningaasatigut kingunissaata misissuiffigineqarluarnerani siulliuvoq.
Misissuinermi siullermi Atlantikoq qulaallugu timmisartuussisarnermi nunatsinni mittarfinni, assigiinngitsuni marlunni ineriartortoqarnerata nunatta karsianut kingunerisassaanut tunngavoq.
Misissuinermi immikkoortup aappaa (suli tamanut saqqummersinneqanngilaq) inuiaqatigiinnut aningaasatigut kingunissat siammasinnerusumik naliliiffigineqarnerannik imaqartussaq.
Misissueqqissaarnerit Deloittep Naalakkersuisunut suliarai.
Mittarfeqarfiit mittarfiutaat pingasuinnaat maannakkorpiaq sinneqartooruteqarlutik ingerlapput, taakkulu ilagaat Kangerlussuarmi mittarfik. Tamannalu pissutigalugu 87 millionit koruuninik Mittarfeqarfiit amigaatigiligassaannik tapiissuteqartoqarnissaa pisariaqartinneqalissaaq.
AAMMA ATUARUK Mittarfinnut suliniutinut misissueqqissaarineq naak?
Namminersorlutillu Oqartussat imarpik ikaarlugu angalanermut akitsuummik 87 millionit koruuninik aningaasartalimmik eqqussiniarput, Nunatsinnut nunatsinniillu angalasunit aningaasalersorneqartussamik. Akitsuulli taama ittoq billetsinik tunisanut angalariaatsimullu qanoq sunniuteqassanersoq suli misissoqqissaarneqarsimanngilaq.
Deloittep naatsorsuineri naapertorlugit, mittarfissuit maanna pioreersut, Kangerlussuup Narsarsuullu nutarteriffiginerinut aningaasalersuiffiginerinullu taarsiullugu, Nuummi Ilulissanilu mittarfiit tallilerneqarnissaannut aningaasalersuinerit nunatta karsianut ukiuni tullerni 25-ni 165 millionit koruuninik sipaaruteqartitsissapput.
