GE: Mittarfinnut suliniutinut misissueqqissaarineq naak?

Naalakkersuisut siulittaasuata, Kim Kielsenip, qinersinissamik noqqaassutaa Inatsisartut aqagu akuersissutigissappassuk, taava mittarfiliornissamut isummernissaq Inatsisartut nutaat suliassaanni siulliit pingaarnerillu ilaanniissaaq.

Naalakkersuisut Qaqortumi, Nuummi Ilulissanilu mittarfiliorsinnaanissaannut inatsisissatut siunnersuut jannuaarimi tusarniaassutigilerpaat, inatsisissatulli siunnersuutip tusarniaassutigineqarneranut atatillugu inuiaqatigiit aningaasaqarnerannut kingunissaanik misissueqqissaarnerit Naalakkersuisut suli saqqummiutinngilaat.

Tamanna ilaatigut GE-mit Qeqqata Kommunianiillu isornartorsiorneqarpoq.

GE: Tunngavilersorluagaanersoq nalilersorsinnaanngilarput

- Tamakkua siunnersuummut tusarniaassutigineqartumut ilanngunneqannginneri, GE-p paasisinnaanngilaa. Taamaanneratigut tusarniaaffigineqartut aalajangerneq tunngavilersorluagaanersoq pillugu nalilersuinissaannut periarfissaqanngillat. GE attaveqaqatigiinnermut naalakkersuisoqarfimmut tusarniaanermi akissuteqarluni taama allappoq.

AAMMA ATUARUK Mittarfiit amigartoorutaat akitsuusersuinikkut aningaasalersorneqassapput

Qeqqata Kommuniani aamma taama isumaqartut, aviisip Sermitsiap, kommunip tusarniaanermi akissutaanik pissarsisimasup, allaaseraa.

- Qeqqata Kommuniata siunnersuummut atortut pissarsiarisinnaatinnagit inatsisissatut siunnersuut oqaaseqarfigiuminaatsippaa, kommuni ilaatigut allappoq.

Allagaatinik takunnissinnaatitaaneq atorlugu takunnikkumaneq akuerineqanngitsoq

Nunatsinni attaveqatigiinnerup pitsanngorsarneqarniarnera ajunngitsuusoq, GE-p erseqqissaatigaa. Tamannali tunngavissaqarluarluni suliarineqartariaqartoq, peqatigiiffik isumaqarpoq.

- Pissutsit misissuiffigineqaqqissaannginnerini Naalakkersuisut taama angitigisumik aningaasaliinissamik kissaateqarnerat GE-p attanneqarsinnaanngitsutut isigaa, peqatigiiffik tusarniaanermi akissummini allappoq.

AAMMA ATUARUK Professorip mittarfik pillugu paasissutissat ujartorai

Mittarfiit sanaartorneqarnissaannut sinaakkutaasutut inatsisissatut siunnersuummut atatillugu inuiaqatigiinni aningaasaqarnikkut kinguneriumaakkat pillugit misissuinerit KNR-ip allagaatinik takunnissinnaatitaaneq atorlugu januaarip qiteqqunnerani takujumavai. Kisianni suli akuerineqanngilaq.

AAMMA ATUARUK Naalakkersuisut 2,1 milliardit koruunit mittarfinnut aningaasaliissutiginiaraat