Mittarfiit amigartoorutaat akitsuusersuinikkut aningaasalersorneqassapput
Akitsuusersuinerli takornarianut qimaatitsissasoq, Takornariaqarnermut Siunnersuisoqatigiiffiup oqaatigaa.
- Neriuppugut takornariaqarnermut akornutaassanngitsoq, Visit Greenlandimi pisortamut tullersortaagallartoq Mads Daniel Skifte taama oqarpoq.
Nuup Kangerlussuullu mittarfiisa ingerlatsinermi aningaasanik sinneqartoorutaat nunatsinni heliportinut mittarfinnullu amigartooruteqarfiusunut tunniunneqartarput.
Nuummi Ilulissanilu mittarfittaassat atuutsinneqalerpata amigartoorutit Namminersorlutik Oqartussat matussutissarsiortariaqartassavaat, inatsisissatummi siunnersuut naapertorlugu Kalaallit Airportsip sinneqartoorutai Nunatsinni mittarfinni ingerlatsinernut amigartooruteqarfiusunut matussusiisussatut atorneqassanngillat.
AAMMA ATUARUK Mittarfiliortiternermut aningaasalersueriaasissaq atoqqunngikkaa
Nunatsinnummi angalanissamik tuniniaanermi akit suli qaffasissorujussuunerat takornarialerisunut ajornakusoortitsisartoq, Takornariaqarnermut Siunnersuisoqatigiiffiup oqaatigaa.
- Akitsuutit annertuallaassappata aamma akornutaanissaa ersissutigisinnaavarput, Mads Daniel Skifte taama oqarpoq.
Nunanit tamalaanit takornariat qanoq annertutigisumik akitsuutinut akiliisassanersut suli maannamut oqaatigineqarsinnaanngilaq.
Nunatsinni takornariaqarneq akitsuusersuinikkut qanoq annertutigisumik sunnerneqarnissaa, Mads Daniel Skiftip oqaatigisinnaanngilaa.
- Soorunami takornariat maangarniissaat kissaatigaarput aningaasarsiutiginiassagatsigit, Visit Greenlandimi pisortamut tullersortaagallartoq Mads Daniel Skifte KNR-imut taama oqarpoq.
Nunatta takornariaqarnerulernissamik takorluugaa, aningaasaqarnikkut kaaviaartitsilersussaq ajoquserneqassanngitsoq, Mads Daniel Skiftep neriuutigaa.
AAMMA ATUARUK Mittarfiliassat aningaasanut inatsit pissutigalugu kinguartinneqartut
AAMMA ATUARUK Danske Bank mittarfiliornissamut aningaasaliisussarsioqataassaaq
