Professorip mittarfik pillugu paasissutissat ujartorai
Qaqortumi mittarfik atugarissaarnermut aningaasaqarnikkut aningaasaliinertut, Kujataani siuariartortitsinissamut periarfissaqarfiusunik siuarsaasussatut, Naalakkersuisunit isigineqarpoq. Mittarfilli qanoq iluaqutaatigissanersoq suli nalunartoq, aningaasaqarnermut professori, Torben M. Andersen oqarpoq.
- Misissueqqissaarnerit taakku suli saqqummiunneqanngillat. Mittarfiup iluaqutigisinnaasai aningaasaliinermut missiliunneqarsinnaaniassammata, inuiaqatigiit aningaasaqarnerannut sunniutigisinnaasai pillugit misissueqqissaarnermik peqarnissaq pitsaassagaluartoq oqaatigineqarsinnaavoq, Torben M. Andersen oqarpoq.
Qaqortumi mittarfissaq tapiiffigineqanngitsumik ingerlatsinissamut tunngavissaqanngitsoq, mittarfiit sananeqarnissaannut aningaasalersorneqarnissaannullu sinaakkutissatut piumasaqaatit pillugit Naalakkersuisut siunnersuutaanni januaarip qiteqqunnerani tusarniaassutigineqalersumi allaqqavoq.
AAMMA ATUARUK Naalakkersuisut 2,1 milliardit koruunit mittarfinnut aningaasaliissutiginiaraat
Apeqquterpassuit
Aningaasaliinissarujussuarlu pineqarmat paasissutissaateqarnissaq pingaartuusoq, aningaasaqarnermut professorip oqaatigaa.
- Mittarfik aqqutigalugu qanoq angalasoqartigisarnissaanut tunngasut, kisianni aamma inuussutissarsiornerup ineriartortinneqarnissaanut qanoq sunniuteqarnissaanut tunngasut eqqarsaatigalugit. Tassalu apeqquterpassuit oqallinnermi uani soorunami pingaaruteqarput, Torben M. Andersen oqarpoq.
AAMMA ATUARUK Imminut akilersinnaanngitsunut aningaasaliinaveersaartariaqarpugut
Ilulissani, Nuummi Qaqortumilu mittarfissat sananeqarnissaat katillugit 3,6 milliardit koruuninik akeqassangatinneqarpoq. Aningaasaqarnermut naalakkersuisoqarfik naapertorlugu sanaartugassanik suliassinneqartartunut isumaqatiginninniarnissat eqqarsaatigalugit mittarfiit ataasiakkaat qanoq akeqarnissaat saqqummiunneqanngilaq.
Qaqortumi mittarfissap nunatta karsianit tamakkiisumik aningaasalersorneqarnissaa naatsorsuutigineqartoq, siunnersuummi tusarniaassutigineqartumi atuarneqarsinnaavoq.
Politikkikkut aalajangerneq
Namminersorlutik Oqartussallu ataavartumik aningaasartuuteqalersinnaasut, Torben M. Andersen isumaqarpoq.
- Mittarfik imminermini akilersinnaanngippat, taava mittarfiup ingerlanneqarnissaanut nalinginnaasumik tapiisoqartariaqartarsinnaavoq. Kisitassallu taakku suli ilisimanngilagut, Torben M. Andersen oqarpoq.
Naalakkersuisulli naapertorlugit Qaqortumi mittarfissaq atugarissaarnermut aningaasaqarnikkut aningaasaliineruvoq, Kujataani siuariartortitsisussaq.
Aamma nunatsinni attaveqaatinik ataqatigiinnerulersitseqataanissaa tunngavilersuutigineqarpoq.
AAMMA ATUARUK Mittarfiliortiternermut aningaasalersueriaasissaq atoqqunngikkaa
Qaqortumilu mittarfiliornissamut aalajangerneq aningaasaqarnermik aallaaveqarnani politikkikkut anguniagaqarnermik aallaaveqartoq, Torben M. Andersen oqarpoq.
- Tamanna soorunami oqallisigineqarsinnaavoq. Pingaartuusorli tassaavoq, aalajangernerup taassuma kingunerisassai paasissallugit. Akeqassaaq aningaasallu taakku allanut atorneqarsinnaanavianngillat. Taassumalu missingersuunneqarnissaa politikkikkut isummerfigineqartussaassaaq, aningaasaqarnermut professori Torben M. Andersen oqarpoq.
