Mittarfittaassat 165 millioninik sipaaruteqartitsissasut
Taamatulli naatsorsuinermi Qaqortumi mittarfimmut aningaasartuutaangaatsiartussatut naatsorsuutigineqartumut aningaasartuutissat ilaatinneqanngillat.
Mittarfiliortitsinerit nunatta karsianut aningaasatigut kingunerisassaat pillugit nalunaarusiap siunnersuisarfiup Deloittep Namminersorlutik Oqartussat sinnerlugit suliarisimasaata KNR-illu allagaatinik takunnikkumanermigut pissarsiarisimasaata immikkoortuani siullermi tamanna paasinarsivoq.
AAMMA ATUARUK Kinamiut sanaartornissamut neqerooruteqarnerannut danskit akuliukkumasimanngillat
Deloittep naatsorsuineri naapertorlugit, mittarfissuit maanna pioreersut, Kangerlussuup Narsarsuullu nutarteriffiginerinut aningaasalersuiffiginerinullu taarsiullugu, Nuummi Ilulissanilu mittarfiit tallilerneqarnissaannut aningaasalersuinerit nunatta karsianut ukiuni tullerni 25-ni 165 millionit koruuninik sipaaruteqartitsissapput.
Mittarfiit pillugit misissuineq suliap aningaasatigut kingunissaata misissuiffigineqarluarnerani siulliuvoq.
Misissuinermi siullermi Atlantikoq qulaallugu timmisartuussisarnermi nunatsinni mittarfinni, assigiinngitsuni marlunni ineriartortoqarnerata nunatta karsianut kingunerisassaanut tunngavoq.
Misissuinermi immikkoortup aappaa (suli tamanut saqqummersinneqanngilaq) inuiaqatigiinnut aningaasatigut kingunissat siammasinnerusumik naliliiffigineqarnerannik imaqartussaq.
Misissueqqissaarnerit Deloittep Naalakkersuisunut suliarai.
Nalunaarusiami inerniliussani Deloitte allappoq Qaqortumi mittarfiup sanaartorneqarnera ingerlanneqarneralu imarpik ikaarlugu angallannikkut aaqqissuussinermut nutaamut ilaatinneqanngitsut, taamaattumillu mittarfissuit nutaat pioreersullu aningaasalersuiffigineqarnerinik naleqqiussinermut ilaanngitsoq.
Taamaammat mittarfiliortiternerit ataatsimoortut, tassa Nuummi, Ilulissani Qaqortumilu mittarfiit, aningaasatigut qanoq kinguneqassanersut suli nalunarpoq.
AAMMA ATUARUK Mittarfiliornissamut sanaartortussat toqqarneqartut
Nuummimi Ilulissani mittarfissuit ataatsimut nunatta karsianut sipaaruteqarfiussasut, Deloitte allappoq Qaqortumi mittarfissaq Kalaallit Airportsimut aningaasartuutaangaatsiassasoq.
Deloittelli aamma oqaatigaa sunniutissanik allanik peqartoq ilanngullugit naatsorsorneqarsimanngitsunik, taakkuli mittarfittaassanik suli pilerinarnerulersitsinissaat naatsorsuutigineqartoq.
AAMMA ATUARUK Sulineq qinersisoqaraluartoq ingerlaannassaaq