Mittarfiliornissamut sanaartortussat toqqarneqartut
Kalaallit Airports A/S tusagassiutinut nalunaarummi taama ilaatigut allaaserisaqarpoq.
Sanaartugassanik suliarinnittartut neqerooruteqartussatut toqqarneqartut arfinillit akornanni pingasut Danmarkimeersuupput, taakkunannga ataaseq Danmarkip Islandillu suleqatigiissutigisaat. Taakku saniatigut neqerooruteqartussatut toqqarneqartut tassaapput Hollandimeersut, Kinameersut Canadameersullu.
- Aarsleff - Ístak Joint Venture (Danmark/Island)
- BAM International bv. (Holland)
- China Communications Construction Company Ltd. (Kina)
- Munck Gruppen A/S (Danmark)
- MT Højgaard A/S (Danmark)
- Pennecon Dexter Joint Venture (Canada)
Suliassat pingaartumik mittarfissanik, mittarfiup iluani aqqusinernik aamma silataanni nunaminertanik, timmisartoqarfiit ungaluisa iluani teknikkikkut ikkussuinertaqartunik, sanaartornermut tunngassuteqassapput.
AAMMA ATUARUK Sulineq qinersisoqaraluartoq ingerlaannassaaq
Sanaartugassanik suliaqartartut ataatsimoortukkaat piukkunneqartut taakkua qaammatit tulliuttut ingerlaneranni, sumiiffiit suliaqarfiusussat najukkanimilu pissutsit namminneq tikillugit paasisaqarfiginiarlugit, Ilulissat aamma Nuuk tikeraassavaat.
Aningaasalersunissaq amigaataasoq
Mittarfiit ingerlanneqarnissaannut aningaasalersorneqarnissaannullu siunnersuut politikerinit suli akuerineqanngilaq, Inatsisartummi upernaakkut ataatsimiinnissaanni tamanna oqaluuserineqartussaagaluarpoq.
Apriililli 24-anni qinersisoqartussanngormat siunnersuut kinguartinneqarpoq.
AAMMA ATUARUK Mittarfinnut suliniutinut misissueqqissaarineq naak?
Naak qinersisoqartussanngoraluartoq, Kalaallit Airportimi siulersuisut siusinnerusukkut nalunaarutigaat suliatik ingerlatiinnassallugit - qinersisoqartussaaneralu pissutigalugu Nuummi mittarfiup tallineqarnissaanut kinguaattooruteqarlaarsinnaannera allaqqunneqarsinnaanavianngilaq.
Mittarfiit pingasut pilersaarutit malillugit 2022-imi atulertussatut pilersaarutaavoq.
