Kalaallit Airports: Sulineq qinersisoqaraluartoq ingerlaannassaaq
Pilersaarut malillugu Nuummi Ilulissanilu mittarfiit tallineqarnissaannut Qaqortumilu nutaamik mittarfiliornissamut aningaasaliinerit upernaakkut ataatsimiinnermi akuerineqartussaagaluarput.
Aalajangiinissalli kinguartinneqartariaqarneranut qinersinissaq peqqutaagaluartoq Kalaallit Airports naapertorlugu suliaq unittuuinnavianngilaq.
AAMMA ATUARUK Aalisarnermut inatsit mittarfiillu kinguartinneqartussanngortut
Nuummi Ilulissanilu mittarfiit tallineqarnissaannut suliariumannittussarsiuussinissap maajimi pinissaata suliarinera ingerlaannassasoq siulittaasut ataatsimiinnerminni aalajangerpaat.
Tamatumalu saniatigut mittarfiit pingasut pillugit pilersaarusiornissamut siunnersuisussanik toqqaaniarneq ingerlaannassasoq aalajangerneqarpoq.
Kinguaattoorsinnaasoq
Naak siulersuisut naapertorlugit tamanna suliffeqarfiup suliariumannittussarsiuussinissaanut aningaasaliinermillu tunngavissaat politikkikkut akuersissuteqarfigineqartussat suliarineranni piffissaq attatiinnaraluarlugu aallartinnissamut qinersinerup kinguaattoortitsisinnaanera mattutinngilaa.
- Inatsisartunut qinersineq aammalu qinersereernerup kingorna Naalakkersuisunngortitsinissap tungaanut piffissaq Nuummi aamma Ilulissani sanaartornermik suliassat neqeroortitsivigineqarnerannut sunniissasut mattunneqarsinnaanngilaq, taamaalilluni Nuummi mittarfiliassap aallartinnissaa 2018-imi oktobarimi pisussatut pilersaarutigineqartoq, kinguaattoorsinnaalluni, Kalaallit Airportsimi siulersuisuinut siulittaasoq Johannus Egholm Hansen tusagassiuutinut allappoq.
AAMMA ATUARUK Mittarfiliassat aningaasanut inatsit pissutigalugu kinguartinneqartut
Nuummili sanaartornissap kinguaattuunnginnissaa pinaveersaartinniarlugu erseqqissaatigaa.
Qinersinerulli Ilulissani Qaqortumilu pilersaarutit sunnissanngikkai siulittaasup naatsorsuutigaa.
