Samuelsen: Kinamiut sanaartornissamut neqerooruteqarnerannut danskit akuliukkumasimanngillat
Kalaallit Nunaanniittut mittarfiit Kalaallit Airports A/S-ip kinamiut suliffeqarfiutaat akuerisimavaa sanaartugassanik suliassinneqartartut allat tallimat peqatigalugit mittarfinnik pingasunik allilerinissamut neqerooruteqartussatut.
Nutaarsiassaqartitsivik Reuters naapertorlugu danskit naalakkersuisuisa Kalaallit Nunaat neqeroorummut mianersoqqusimavaat, nunanulli allanut tunngasunut ministerip Anders Samuelsenip tamanna Ritzauimut eqqunnginnerarpaa.
Reuters naapertorlugu mianersoqqussut peqquteqarpoq kinamiut sanaartugassanik suliassinneqartartut sulisinneqassappata Danmarkip iligisaanut qanittumut USA-mut tunnerlussinnaammat.
Reutersip danskeq atorfikkaaq oqaloqatigisimavaa assut aarlerinarneraasimasoq, Kina Kalaallit Nunaanni susassaqannginnerarlugu.
- Iligisatsinnut qaninnerpaamut USA-mut Danmark naammassisariakkaminik akisussaafferujussuaqartoq, atorfikkaaq Reutersimut oqarpoq.
- Reutersilli allaaserisaani kinaassutsiminik isertuussisup oqaaserisai naalakkersuisut isumarinngikkaat, Anders Samuelsen allakkatigut oqaaseqaateqarluni allappoq.
Kalaallit Airports ippassaq tusagassiuutinut allappoq China Communications Construction Company (CCC) sanaartugassanut neqerooruteqartussanut allanut tallimanut toqqarneqartunut ilaasoq.
Ingerlatsiviit neqeroortut allat tallimat tassaapput danskit marluk, pukkittormioq ataaseq, canadamiu ataaseq Islandimeersorlu ataaseq.
Danmarkimi naalakkersuisut Kalaallit Nunaanni qinersisoqarnissaanut atatillugu akuliunniannginnertik aalajangiusimallugu, Danmarkip nunanut allanut tunngasunut ministeriata Anders Samuelsenip allakkatigut oqaaseqaateqarnermini ilaatigut oqaatigaa.
