Kangerlussuaq takornariaqarfiulluartartoq umiarsualivittaassaaq

Kangerlussuarmi umiarsualiviortoqaneratigut takornariaqarneq ineriartortinneqassaaq. Naalakkersuisoq Erik Jensen taama oqarpoq.
Assi © : Mittarfeqarfiit
decembarip 16-at 2017 16:26

Naak Namminersorlutik Oqartussat 2015-imi nalunaarusiaminni  allakkaluaraat, Nuummi Ilulissanilu mittarfiit tallineqarpata ilaasullu Kangerlussuakkoortartut ikilippata Kangerlussuarmi umiarsualivik naleqqussartariaqassasoq, Kangerlussuarlu atorunnaariartussasoq.

Umiarsualivissanut nutaanut pingasunut ilaatigut Kangerlussuarmut 60 milliuunit koruunit immikkoortinneqareersimasut, Erik Jensen Qanoruumut oqarpoq.


Kangerlussuarmi siuarsaasoqassaaq
- Erseqqissaatigissavarput takornariaqarpassuit Kangerlussuarmukartarmata, taamaattumik Naalakkersuisut takornariaqarnikkut siuarsaarusupput, tamannalu naalakkersuisooqatigiit isumaqatigiissutaanniippoq, periarfissallu pitsanngorsarusuppavut, Erik Jensen taama oqarpoq.

Erik Jensenip aamma oqaatigaa, Kommune Kujalleq aamma Qeqqata Kommunia peqatigalugit Kangerlussuup Narsarsuullu siunissaat pillugit suleqatigiissitaliortoqarsimasoq.

- Taamaalilluta takornariaqarnikkut inuussutissarsiornikkullu pilersaarutitsinnik qanimut suleqatigivagut, Erik Jensen Qanoruumut taama oqarpoq.