Visit Greenland Kangerlussuarmi umiarsualivik takornarianut iluaqutaassaaq
Kangerlussuarlimittarfissuujunnaassappat politikerit takornarialerisullu aaqqiissuteqartariaqarput.
Kangerlussuullu qinnguata nunaata takornariarfissaqqissorsuusoq, Visit Greenlandimi pisortap tullia Mads Daniel Skifte isumaqarpoq.
- Sermersualiartartut arlalissuupput taavalu nunamik atuineq qimussiussineq , piniartitsineq, aalisartitsineq aamma pisuttuartitsineq tamakkua atuukkamik takornariarpassuillu aqqusaartarlutik, Mads Daniel Skifte oqarpoq.
Takornariat Kangerlussuup qinnguanut timmisartumik tikikkaangamik amerlasuut umiarsuarnut takornariartaatinut ikiartortarput taamatullu umiarsuarmeersut aamma timmisartumik aallariartortarlutik. Takornarianilli assartuiniarneq ajornaatsuinnaaneq ajorpoq.
- Atugaat ilaatigut ajornartorsiortitsikujuttaramik massakkut umiarsualivimmi atugassarititaasut eqqarsaatigalugit, taavalu umiarsuarmut assartuisarnerat ilaatigut tamaviaarnartarunarami. Taamaammat umiarsualivitaassappata iluaqutaasussat ilagissavaat.
Naleqqussaasoqartariaqartoq
Nuummi Ilulissaniluunniit mittarfissualiortoqarpat Kangerlussuarmi umiarsualiviliassap qanoq atorfissaqartinneqartigissanera umiarsualivinnut immikkoortumut pilersaarummi 2015-meersumi tulluarsartariaqarsorineqarpoq. Taamaammallu takornarialerisut politikerillu Kangerlussuup qinnguata takornariaqarnikkut kajungernartuutittuaannarnissaanik kivitassaqarput.
- Uani takornarialerisut aamma politikkikkut aaliangiisartut aaqqiinissaat pingaarpoq. Aammali takornarialerisut pilersaaruteqartariaqassapput ukiunut arlalinnut siunnerfeqartumik, Visit Greenlandimi pisortap tullia, Mads Daniel Skifte oqarpoq.