Danmarkip mittarfiliassanut aningaasaleeqataanissaa inaarutaasumik atsioqatigiissutigineqartoq
Isumaqatigiissut Statsministeriami ataatsimiinnermi, Danmarkimi nalunaaqutaq malillugu nal. 13.00, atsioqatigiissutigineqarpoq.
Piginneqatigiinnissamik isumaqatigiissutip imarisaata Inatsisartut aningaasaqarnermut akileraartarnermullu ataatsimiititaliaanut saqqummiutereerneratigut Kim Kielsenip isumaqatigiissut atsiorsinnaanngorpaa.
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.
AAMMA ATUARUK Løkkep danskit mittarfinnut aningaasaliissutaat illersorpaa
Danskit naalagaaffiata Kalaallit Airports Internationalimi aktianik 700 millionit koruunit nalinginut pisinissaanut piumasaqaatit piginneqatigiinnissamik isumaqatigiissummi aalajangersarneqarput.
Aammattaaq ilassutitut 900 millionit koruuninik naalagaaffiup taarsigassarsititsinissaanut taarsigassarsinermilu qularnaveeqqusiinissaanut qanoq ittunik piumasaqaateqassanersoq isumaqatigiissutigineqarpoq.
Lars Løkke Rasmussenip atsioqatigiinneq "Kalaallit Nunaannut imminut annertunerusumik napatittussamut nukittunerulersussamullu alloriarnerusoq pingaarutilik" oqaatigaa.
- Naalagaaffeqatigiinnerput nukittuujulluni ineriartorlunilu siumukartuussasoq kissaatigaara. Tamannalu ullumi isumaqatigiissutip atsiornikkut aamma naqissuserpara. Ukiut arlaqanngitsut qaangiuppata, Kalaallit Nunaata illoqarfittut pingaarnersaannut Nuummut Ilulissanullu iluliarpassuaqarfimmut toqqaannartumik timmisartukkut tikittoqarsinnaalissaaq, ministeriuneq oqarpoq.
Atsioqatigiinneq Kim Kielsenip aamma nuannaarutigaa.
- Isumaqatigiissutip matuma qallunaat Naalakkersuisuisa, uagullu Naalakkersuisutta Kalaallit Airports Holding peqatigalugu atsiukkatta pimoorullugu naqissuserpaa Nuummi Ilulissanilu mittarfissuassat nunanit tamalaanit tikinneqarsinnaasussat suliarineqarnerat aallartinneqartoq, naalakkersuisut siulittaasuat oqarpoq.
Kim Kielsenip qanittukkut oqaatigaa danskit naalagaaffiata mittarfiliornissamik suliuniummut peqataaneratigut mittarfiit tallilerneqarnissaat aningaasaqarnikkut 1 milliard koruunit missaannik pitsanngoriaateqarfiussasoq.
AAMMA ATUARUK Kim Kielsen Lars Løkke Rasmussenilu mittarfiliortiternissaq pillugu isumaqatigiissusioqqipput
Danmarkip mittarfinnut aningaasaleeqataanissaa partiinit illuatungiliuttunit Inuit Ataqatigiinnit Partii Naleqqamillu siornatigut isornartorsiorneqarpoq.
Partiit ilaatigut isumaqarput mittarfiit tallilerneqarnissaannut Danmark oqaasissaqartitaavallaassasoq.
Naalagaaffiup mittarfissuassanut suliniummut peqataanerat inaarutaasumik akuereqqullugu Folketingip Finansudvalgianut tunniunneqassaaq.
