Assi: KNR

Kim Kielsen Lars Løkke Rasmussenilu mittarfiliortiternissaq pillugu isumaqatigiissusioqqipput

Naalakkersuisut siulittaasuat ministeriunerlu mittarfiliortiternissaq pillugu ullumi isumaqatigiissuteqaqqipput. Ullumi isumaqatigiissut qallunaat mittarfiliorternissamut tapiissuteqarnissaannut septembarimi isumaqatigiissutaasumut tapiliussaavoq.

Kim Kielsen aamma Lars Løkke Rasmussen Københavnimi pingasunngornermi ullup qeqqata siorna  ataatsimiipput.

Tassani taakkua mittarfiliortiternissamut qallunaat aningaasaleeqataanissaannut isumaqatigiissummut tapiliussamik isumaqatigiissuteqartut, ministeriuneqarfik paasissutissiivoq.

- Kalaallit Nunaanni attaveqaatinik nutarterinernut naalagaaffiup peqataanissaanut tunngavissat anguleratsigit nuannaarutigaara, Lars Løkke Rasmussen ataatsimeereeramik oqarpoq.

Taannalu Kim Kielsenimit ilalerneqarpoq.

- Mittarfiliassat atuisunut iluanaarutaarujussuartussaapput aamma mittarfiliassanut naalagaaffiup peqataanerata mittarfinni nutaani aningaasaqarneq 1 mia. koruunit missaannik pitsanngoriartissavaa, Kim Kielsen oqarpoq.

Kim Kielsen aamma Lars Løkke Rasmussen qallunaat mittarfiliortiternissat piviusunngortinnissaannut aningaasaleeqataanissaannik siorna septembarimi aamma isumaqatigiissuteqarput. 

Danmarkip pilersaarummut 700 millionit koruuninik aningaasaliinissaa taavalu nunatta 900 millionit koruuninik attartornissaanik periarfissillugu. Nunarput allatigut attartorniaraluani aningaasartornerussagaluarpoq.

Isumaqatigiissutip mittarfiliortiternissaq akikinnerulersippaa patajannrulertillugulu, aammali isumaqatigiissuteqarneq aalassatitsivoq, ilaatigullu Partii Naleraq naalakkersuisoqatigiinni ilaajunnaarpoq.

Tapiliussatut isumaqatigiissut sumik tigussaasumik imaqarnersoq tamanut suli ilisimatitsissutigineqanngilaq.

Naalakkersuisut danskillu naalakkersuisuisa akornanni tapiliussatut isumaqatigiissut tamaat uani atuarsinnaavat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat