ASSIT: Mittarfiit nutaat ima isikkoqalissapput

Ingerlatseqatigiiffiup Kalaallit Airportsip mittarfiit illutassaasa ilusilersorneqarnissaannut unammasitsinerani suliffeqarfik ajugaasoq marlunngornermi ilisaritippaa.

Ajugaasoq tassaavoq siunnersuisarfik COWI A/S taassuma ataaniissalutik suliffeqarfiit siunnersuisartut Masanti A/S aamma Zeso Architects A/S.

COWIp siunnersuutaata ajugaasutut toqqarneqarneranut piukkunnarsiuisussatut ataatsimiititaliaq ima allappoq :

- Siunnersuutigineqartut sanaartornissamut pilersaarutigineqartunut maligassaqqissuupput.   

- Siunnersuuteqartut atortut pisariunngitsut atorlugit immikkut ittumik siunnersuusiorput, qajannaatsunik
misigisaqarluarfigineqarsinnaasunik, issittumilu imaannaanngitsumi mittarfinnik nutaaliaasunik ilusilersorsimasunik, piukkunnarsiuisussatut ataatsimiitialiaq taama allappoq.
 
Mittarfiit illutassai pingasut silatimikkut uingasunik iigaqarlutik imminnut eqqaanartuussaapput, COWI-imit oqaatigineqartut naapertorlugit, mittarfiit avatangiiserisaminnut tassalu qaqqanut ujaqqanut serminullu iigartartunut naleqqussarneqassapput.

Mittarfiit pingasut illutassaasa silataat atortunik assigiingitsunik sananeqassapput.

Nuummi mittarfiup illutassaata silataa betonemik sananeqassaaq, Ilulissani alumiiniumik Qaqortumilu qisummik.

Mittarfiit  illutassaasa igalaavi angisuujussapput, pinngortitaq taakkua avataaniittoq takuneqarsinnaanerussammat.

Mittarfiit illutassaasa ilui qisummik sananeqassapput.

Kalaallit Airportsimi piukkunnarsiuisussatut ataatsimiitialiaq siunnersuutinik pingasunik toqqagassaqarsimavoq taakkua mittarfiit assigiinngitsut pingasut tamarmik immikkut siunnersuusiorneqarnerannut toqqaasussaallutik.

Mittarfiit ataasiakkaat pilersaarusiorneqarnerat immikkut nalilersuiffigineqarput, uanilu tassa COWI-p siunnersuutaa mittarfinnut pingasunut pitsaanerpaatut toqqarneqarpoq.

Kalaallit Airportsip COWI-mik isumaqatigiissuteqarnissaq siunertaralugu isumaqatiginniarnini aallartissavaa.

Suliffeqarfik siunnersuisarfiutigisoq COWI, mittarfiit pilersaarusiorneqarnerannut aqquserngillu mittarfiit tungaanukartut pilersaarusiorneqarnissaannut suliarinnittussatut siorna juulimi toqqarneqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat