Løkke Nuummi Ilulissanilu mittarfinnik piginneqataarusuttoq
- Naalagaaffiup Nuummi Ilulissanilu mittarfiit pillugit akuunissaa kissaatigaara, tamannalu isumaqatigiissumi matumani pineqarpoq. Taamaaliornikkut suliniutigineqartumi aningaasalersuinermut tunngatillugu aningaasartuutitigut annertuumik sipaaruteqartoqassaaq suliniullu imminut nammassinnaanerussalluni, Lars Løkke oqarpoq
Danmark Nuummi Ilulissanilu mittarfinnut 700 millionit koruuninik aningaasaliissuteqarpoq mittarfinnullu piginneqataassutaa 33,3 procentiussaaq.
- Tamatuma saniatigut Den Nordiske Investeringsbankimit 450 millionit koruuninik taarsigassarsinissamik qinnuteqaateqartoqarpoq, naalagaaffik taarsigassarsinermut qularnaveeqqusiissaaq, taarsigassarsinermi erniaritinneqartut sapinngisamik appasinnerpaaffimmiitikkumallugit. Kiisalu aningaasalersuinissamik pisariartinneqartut sinnerinut naalagaaffik erniakitsumik 450 millionit koruuninik taarsigassarsititsissaaq. Taamaaliornikkut mittarfiit marluusut aningaasalersorneqarnissaat imminut nammassinnaalluassasoq, Lars Løkkep oqaatigaa.
AAMMA ATUARUK Nunasiaatillit, Kim kisermaassilluni ingerlatsisoq aamma angerlarit
Aammattaaq naalagaaffik Namminersorlutik Oqartussallu Greenland Venture-imut Vækstfondenimullu 200 millionit koruuninik aningaasaliissapput.
Isumaqatigiissut suli atsiorneqanngitsoq oqallisaasupilussuuvoq. Danskit naalakkersuisuinut isumaqatigiissut pissutigalugu Partii Naleraq naalakkersuisooqatigiinnit sapaatiummat tunuarpoq Kim Kielsenilu taamaalilluni amerlanerussuteqarunnaarluni.
Isumaqatigiillumi atsioqatigiissutigineqarpoq. Hans Egedep Illuata silataani akerliussutsimik takutitsisut allagartarsualisaarput danskisut ima oqaasertalinnik: kolonistyre, rejs hjem aamma diktator Kim.
Akerliussutsimilli takutitsisoqaraluartoq Kim Kielsenip isumaqatigissut nuannaarutigaa.
- Soorlu statministerip nuannaarutigigaa, uangattaaq nuannaarutigaara Inatsisartut Kalaallit Nunaanni mittarfiit katitigaanerisa nutarsarnissaat pillugit aalajangernissaannut danskit naalagaaffiannit pingaarutilimmik annertuumillu ikiorsiiniarnissaannut isumaqatigiissuteqarsinnaasimagatta. Kim Kielsen oqarpoq.
Isumaqatigiissutilli Inatsisartunit akuersissutigineqaqqaarnissaa erseqqissaatigaa.
- Inatsisartut tassa taakkuupput taamanikkussamut qaqinneqarpat aalajangiisussat; ilumut aningaasat taakkua tassunga siunertamut atorneqassappat? Uagut massakkut tatigeqatigiilluta atsioqatigiippugut, aamma neriuutigalugu Inatsisartut taanna tigulluarumaaraat. Kisianni tassa oqaqqissuunga; aatsaat taamanikkussamut Inatsisartut amerlanerussuteqarnikkut aalajangeereerpata nalunarnavianngilaq, una saqqummiunneqartoq akuerineqassanersoq, Kim Kielsen isumaqatigiissutigineqartoq pillugu oqarpoq.
Mittarfiliortiternissamik suliniut katillugit 3,6 milliardit koruuninik akeqassaaq. Mittarfiliortiternissamilli suliniutissaq Inatsisartuni aappassaaneerneqarluni pingajussaaneerneqaqqaartussaavoq.
AAMMA ATUARUK Qujaukitsoq tilbage i finansdepartementet
