Mittarfiit pillugit pilersaarut akuersissutigineqarpoq

Mittarfiit pillugit pilersaarut siullermeerneqarmat tamanna partiit ilaannit isumaqatigineqanngitsoq, maanna Inatsisartuni ilaasortanit tamanit aamma Inuit Ataqatigiinnit isumaqatigineqarpoq, taamaallaat Inatsisartuni ilaasortaq ataaseq Naleqqameersoq tamassumunnga akerliulluni taasisoq.

Aamma atuaruk Nuummi mittarfiup 2200 meterinngortinneqarnissaa Naalakkersuisunit ammaanneqarpoq

Mittarfiit pillugit pilersaarut qanoq pilersaarnermik nalunaarutaavoq - tassa Naalakkersuisut suliassinneqarlutik, mittarfiit pingasut illoqarfinni Qaqortumi, Tasiilami Ittoqqortoormiinilu sanaartorneqarnissaannik misissuinissaannik taamatullu Nuup Ilulissallu mittarfiisa tallineqarnissaannik taakkulu atlantikoq qulaallugu tikinneqartarnissaannik misissuinissamik imaqartut.

- Naalakkersuisut sulissutigissavaat, Inatsisartut sanaartornermut ataatsimiititaliaata angorusutai, takorluugai aammalu piumasaqaatai ilanngullugit piviusunngortissallugit, Nunatsinni silaannakkut angallannermi attaveqaqatigiinnerup annertoorujussuarmik ineriartortinneqarnissaanut atatillugu tamanna pissalluni, ineqarnermut, sanaartornermut attaveqarnermullu naalakkersusioq, Knud Kristiansen tusagassiuutinut nalunaarummini allappoq.

Aamma atuaruk Mittarfiit marluk sanaartornermi ataatsimiititaliap salliutippaat

Silaannakkut angallassinermi suliniummut pilersaarusiorneq, misissueqqaarnerit ilaalu ilanngullugit 2016-ip aallartinnerani suliaralugit aallartinneqassapput.

Mittarfiit pillugit Naalakkersuisut pilersaarutaat Inatsisartuni ullumi taasissutigineqarmat, Partii Naleqqami ilaasortaq, Per Rosing Petersen kisiartaalluni tamassumunnga isumaqataanani akerliulluni taasivoq.