Mittarfiit marluk sanaartornermi ataatsimiititaliap salliutippaat
Mittarfiit annerit takininngussapput illloqarfinnilu minnerni mittarfiit naannerussapput. Mittarfiit pillugit siunnersuutit ataatsimoortut Inatsisartuni aqagu oqallisigineqannginneranni Sanaartornermi ataatsimiiititaliamit taama oqariartuuteqartoqarpoq.
Illoqarfinni tallimani mittarfiliortoqassasoq Naalakkersuisut siunertaraat. Nuummi Ilulissanilu mittarfiit tallineqarnissaat salliutinneqassasoq Sanaartornermi ataatsimiititaliap kaammattuutigaa. Illoqarfinnilu taakkunani mittarfiit 2200 meterinut tallineqassasut aamma kaammattuutigalugu.
Takinerusunik siunnersuuteqarput
Kangerlussuarmi mittarfiup misissorneqarnissaa aamma salliutinneqassasoq ataatsimiititaliap kissaatigaa.
Mittarfiit taakku pingasut timmisartorsuarnik miffigineqarsinnaassasut siunertarineqarpoq ajornartoornermilu aamma miffigineqarsinnaniassammata.
Aamma atuaruk Nuummi mittarfiup 2200 meterinngortinneqarnissaa Naalakkersuisunit ammaanneqarpoq
Qaqortumi Tasiilamilu mittarfiliortoqarnissaa suliassatut tullertut ataatsimiititaliap innersuussutigaa. Taakkunani mittarfiit 1499 meterisut takissuseqarnissaat innersuunneqarluni taamaasilluni timmisartunik Q400-nik Dash 8-nillu tamakkiisumik ilaasulinnik miffigineqarsinnaanissaat siunertarineqarluni.
Suluusalinnut mittarfiliortoqarli
Sanaartornermi ataatsimiititaliap namminneq siunnersuutini taperserpaa, tassalu nunap ilaani mittarfiit timmisartunik type pax 19-inik, tassa suluusalinnik, miffigineqarsinnaanngussassut. Tamanna isumaqarpoq mittarfiit ilaat millineqassasut heliportillu allineqassallutik. Taamaasiornikkut angalanissamut piffissarititaq eqqorlugu angalasarnissaq anguniarneqarluni, suluusallit qulimiguulinnut naleqqiullugit silap ajornerani sunneruminaannerusarmata.
Aamma atuaruk Air Iceland: Qaqortumi mittarfiliortoqarnissaq pisariaqartinneqanngilaq
Sanaartornermi ataatsimiititaliap pilersaarutai tassaapput illoqarfinni pingasuni mittarfissuaqalissasoq, Qaqortumi Tasiilamilu aamma mittarfiliortoqassasoq, Mittarfiillu minnerit timmisartunik suluusalinnik 19-inik ilaasoqarsinnaasunik naleqqussarneqarlutik.
Naalakkersuisut siunnersuutaat Narsamiit Qaqortumut ikaartorfiliortoqassasoq ataatsimiititaliap taamaatinneqarnissaa kaammattuutigaa. Suluusalinnullu mittarfimmik Narsami sanasoqarneratigut Qaqortumut timmisartuussisoqarsinnaanngussasoq taarsiullugu siunnersuutigalugu.
