Politikki Inuussutissarsiutit

Nuummi mittarfiup 2200 meterinngortinneqarnissaa Naalakkersuisunit ammaanneqarpoq

Mittarfiit pillugit Naalakkersuisut nutaamik isumaqatissarsiussapput, tamanna pissalluni pingasunngorpat decembarip aappaanni.

Allattoq Apollo Jeremiassen, Jonas Løvschall-Wedel

decembarip 01-at 2015 05:25

Naalakkersuisut ukiaq isummerput, Nunatsinni mittarfiit tallimat ilaat ilaneqarlutik allat pingasut nutaamik sanaartorneqassasut. Maannali saqqummiussassaanni tamanna allanngortinneqarluni siunnersuutigineqassaaq.

Nuummi mittarfiup 1799 meterimut tallineqarnissaa suli attanneqarpoq. Allannguutaali tassaalerpoq, Nuummi mittarfiup 2200 meterimut tallineqarsinnaaneranik periarfissaqartinneqassasoq.

Ilulissani mittarfik 2200 meterimik takissuseqarnissaa siullermik siunnersuutigineqarpoq. Takissulli taanna periarfissaaginnalissasoq Naalakkersuisut siunnersuuteqassapput, tassa taanna 1799 meterinik takissusilerneqassasoq siunnersuutagaami.

Aamma atuaruk Mittarfissat pillugit siunnersuutit ataatsimiititaliamut innersuunneqarput

Tasiilami Qaqortumilu mittarfiliassat takissusaat allanngortinneqanngilaq tassa taakku tamarmik 1199 meteriussasut siunnersuutaagami aamma siunnersuutaalluni taakku 1399 meterimut tallineqarnissaat periarfissaqassasoq.

Siunnersuutaasimasut maanna allanngortinniarneqarnerannut tunngavilersuutaavoq, mittarfiit takissusaat illoqarfinnut assigiinngitsunut naleqqunnerusunngortinneqarnissaannik isuma, tassa illoqarfiit assigiinngitsut niuernikkut tapersersorneqarnissaat tassani eqqarsaataalluni.

Taama nalunaarpoq ineqarnermut, sanaartornermut aamma attaveqarnermut naalakkersuisoq, Knud Kristiansen.