Ataatsimiititaliap Naalakkersuisut inatsisaat tuaviuussaq avoqqaaralugulu akuerigaa

Ataatsimiititaliami amerlanerussuteqartut siunnersuutip atuutilersinneqarnissaa siunnersuutigaat.

- Siunnersuutip matumani pineqartup sooq nalinginnaasumik tusarniaassutigineqarsinnaasimannginneranut tunngaviIersuutit ataatsimiititaliamit amigaatigineqarput.

Aningaasaqarnermut akileraartarnermullu ataatsimiititaliap Naalakkersuisut inatsisaat tuaviuussaq sisamanngornermi aappassaaneerneqannginnerani oqallisigereeramikkut isornartorsiuinerat taama aallartippoq.

Ataatsimiititaliap tusarniaaffigineqartut ataasinngornerup ullaavaniit ataasinngornerup ualianut suliamut akissuteqarnissaminnik periarfissaqarnerat isornartorsiungaatsiarpaa.

Inatsit akuerineqassappat nunamit allameersut mittarfiliornermut atatillugu suliartortitassat nunatta karsianut akileraartassapput. Akileraarut taanna kommunit nunattalu karsiata akornanni agguaanneqartaraluarpoq.

Namminersorlutik Oqartussat aningaasat taakku Nuummi, Qaqortumi Ilulissanilu mittarfiliornerit aningaasalernissaanut atussagaat, Naalakkersuisut siunnersuutiminni tunngavilersuipput.

AAMMA ATUARUK Inatsit tuaviortup mittarfiit aningaasalerneqarnissaat qulakkiissagaa

Kisianni siunertaq suugaluarpalluunniit inatsisissatut siunnersuut Inatsisartuni suliarineqannginnermini torersumik naammassineqaqqaassaaq.

- TaamaaIilluniIu tusarniaanermut akissuteqaasiornissaq tusarniarneqartumut isumaqassappat, siunnersuutip kingunerisassaanik naIiIiinissamut piffissaqartinneqarluni suIiarilluagaasumik sukumiisumillu tusarniaanermut akissuteqaasiornissamut tusarniarneqartup periarfissinneqarnissaa pisariaqarpoq, ataatsimiititaliaq isornartorsiuivoq.

- Taamaattoqanngippat Inatsisartut aaIajangiinissamut tamakkiisumik tunngavissaqartinneqanngeratarsinnaapput, ataatsimiititaliaq allappoq.

Tusarniaanerup ingerlannera ataatsimiititaliap taamaallaat isornartorsiunngilaa. Aningaasaqarnermut akileraartarnermullu ataatsimiititaliap ataatsimiititaliaq Inatsisartullu piffissami sivikitsuinnarni siunnersuummik marlunngornermi siullermeerneqannginnerani isumaginnissinnaanerat ajuusaarutigaa. Taanna ataasinngorpat pingajussaaneerneqarluni naggataarneqassaaq.

AAMMA ATUARUK Inatsit tuaviuussaq tusarniaassutigineqassasoq

Demokraatit Naalakkersuisut avaqqaarpaat

Inatsip piareersarnerata suliarinera tamaat isornartorsiorneqangaatsiaraluartoq ataatsimiititaliami amerlanerussuteqartut, tassalu Inuit Ataqatigiit Siumullu siunnersuut akueraat.

Demokraatit ikinnerussuteqarnerminni oqaaseqaamminni, tusarniaaffigineqartut Inatsisartunilu politikerit siunnersuutip imarisaanut isummernissamut sivikippallaartumik piffissalerneqarsimanerat pillugu inatsisissatut siunnersuut itigartitsissutigineqassasoq allapput.

- Tamat oqartussaaqataaneranni tunngaviit pitsaasut Naalakkersuisunit sanioqqunneqarnerat Demokraatinit sukkulluunniit akuersaarnianngilluinnarparput, tamannalu tunngavigalugu siunnersuut itigartinneqassasoq inassutigaarput.

Naalakkersuisut ataatsimiititaliap isumaliutissiissutaat tusaatissatut tigullugu akissuteqarlutik allapput.

Siunnersuut ullumi sisamanngornermi aappassaaneerneqassaaq, pilersaarullu malillugu naggammik ataatsimiinnermi ataasinngorpat akuerineqassalluni.