Naalakkersuisoqatigiit Demokraatillu Mittarfiliortiternissamik suliaq ingerlateqqeqquaat

Naalakkersuisoqatigiit Demokraatillu mittarfiliortiternissamik suliamik tapersersoqatigiipput siunnersuullu Inatrsisartuni pingajussaaneerlugu suliarineqarnissaa inassutigaat. Nunatsinni attaveqatigiinnissamut aningaasaliinissat oqaluttuarisaanermi annersaat Inatsisartuni amerlanerussuteqartunit taamaalillugu suli tapersersorneqarpoq.
Assi © : KNR
Allattoq Thomas Munk Veirum, Anton Gundersen Lihn, Jens Thorin
novembarip 01-at 2018 13:42

Inatsisartut mittarfiliortitinernissamik siunnersuut ullumi aappaassaaneerlugu suliaraat.

Siumumeersup Karl Kritsian Krusep oqaluttarfimmiit erseqqissaatigaa, naalakkersuisoqatigiit partiivisa Siumup, Atassutip Nunattalu Qitornaaasa mittarfiliortiternissaq tapersersoraat.

- Sumiiffinni inuussutissarsiutit nunatta sinneranut iluaqutaasumik ineriartornerannik tamanna kinguneqassaaq, aalajangiinissaq piffissanngorpoq, Karl Kristian Kruse Naalakkersuisoqatigiit sinnerlugit oqarpoq.

AAMMA ATUARUK Mittarfiliortiternissamut pilersaarut ataatsimiititaliami avissaartuutsitsisoq

Partiit taakkua inatsisissatut siunnersuutip taama isikkoqartillugu pingajussaaneerneqarnissaa inassutigaat.

Mittarfilliortiternissaq pillugu inatsisissatut siunnersuutikkut Naalakkersuisut Nuummi Ilulissanilu tamarmik 2200 meteriusunik nunanut tamalaanut mittarfissualiornissamik, taavalu Qaqortumi nunap immikkoortuani mittarfiliornissamik pisinnaatinneqassapput.

Karl Kristian Kruse Naalakkersuisoqatigiinni partiit tamaasa sinnerlugit oqaaseqartuuvoq. Tassalu partiit Nunatta Qitornaasa aamma Atassutip oqaaseqartartui oqaluttarfimmiit oqaaseqanngillat.

AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut

Aamma Naalakkersuisoqatigiinnut ikorfarfortaasut, Demokratit, Inatsisartut nittartagaanni allassimasut naapertorlugit siunnersuut tapersersorpaat.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk