Naalakkersuisooqatigiilersut Demokraatillu mittarfiit pillugit atsioqatigiissuteqartut
Ilulissat Nuullu 2200 meterisut takissusilimmik mittarfittaassapput. Qaqortoq 1500 meterinik takissusilimmik mittarfittaassaaq, partiillu sisamaallutik Kim Kielsenip danskit ministeriunerannut aningaasaleeqataanissamik isumaqatigiissutaata Inatsisartut ukiaanerani ataatsimiinnermi atuutilersinneqarnissaa sulissutigissavaat.
AAMMA ATUARUK Kielsenip naalakkersuisooqatigiivi nutaat aajuku
Tamatuma saniatigut partiit illoqarfinni nunaqarfinnilu minnerusumik mittarfiliortoqarsinnaaneranut periarfissanik misissuinissaq sulissutiginiarlugu isumaqatigiissutigaat. Tasiilaq, Uummannaq, Kangaatsiaq, Narsaq, Nanortalik, Ittoqqortoormiit, Qeqertarsuaq aamma Qasigiaanguit matumani pineqarput.
Naggataatigulli partiit sisamaallutik Kangerlussuup Sisimiullu akornanni aqqusinniortoqarnissaa sulissutiginiarlugu atsioqatigiissutigaat. Kangerlussuarmi mittarfimmut atatillugu susoqassanersoq isumaqatigiissummi allassimanngilaq. Immikkoortoq taanna partiimi siulittaasut, tassa Niels Thomsenip Kim Kielsenillu siusinnerusukkut isumaqatigiinngissutigisaat.
AAMMA ATUARUK Aalisarneq pillugu inatsisissaq ataatsimiititaliarsuarmut suliassanngortinneqartoq
Kangerlussuup qulimiguulinnuinnaq mittarfinngornissaa Demokraatit kissaatigaat, Kielsenillu mittarfik attatiinnarusuppaa. Kangerlussuarmi Narsarsuarmilu mittarfiit siunissaat Qeqqata Kommunia Kommune Kujallerlu suleqatigalugit aalajangiiffigineqarumaartut Naalakkersuisooqatigiinnissamik isumaqatigiissummi marlunngornermi ullup qeqqanut atsiorneqartumi allassimavoq.
Mittarfiit namminersortunut tunineqarsinnaanerat naalakkersuisooqatigiit aamma isumaliutigerusussinnaavaat.
