Aalisarneq pillugu inatsisissaq ataatsimiititaliarsuarmut suliassanngortinneqartoq

Ukiuni kingullerni politikkikkut assortuussutaanerpaasoq Inatsisartut ukiaanerani ataatsimiinneranni suliarineqassanngilaq, naak Naalakkersuisut taamaaliortoqarnissaanik siornatigut nalunaaruteqaraluartut.

Naalakkersuisooqatigiilersut partiillu tapersersortaasup Demokraatit taarsiullugu inatsisissaq maannakkutut isikkoqartillugu akuersissutigineqassappat Namminersorlutik Oqartussanit taarsiiffigineqarnissamik milliardinik naleqaratarsinnaasoq ataatsimiititaliarsuarmut suliassanngortippaat.

AAMMA ATUARUK Aalisarneq pillugu inatsisissap suliarineqarnera nanginneqassasoq

Inatsisissatut siunnersuut nunatsinni aalisarnerup ingerlanneqarneranik allanngortitsisussaq Inatsisartut ukiaanerani ataatsimiimmata oqallisaasupilussuulluni siullermeerneqarpoq.

Kim Kielsenilu naapertorlugu aalisarneq pillugu inatsisissap Inatsisartuni sapinngisamik amerlanerpaanit taperserneqarluni isumaqatigiissutigineqarnissaa naalakkersuisooqatigiilersut angorusuppaat.

Erik Jensen (S) maanna aalisarnermut naalakkersuisuuvoq, ingerlaannassanersorli nalunarallarpoq.

Aalisarneq pillugu ataatsimiititaliarsuup suliaa qaqugu naammasineqassanersoq Kim Kielsenip piffissalinngilaa.