Assi: Kalaallit Airports A/S

Mittarfiliortiternissamut pilersaarut ataatsimiititaliami avissaartuutsitsisoq

Inuit Ataqatigiit Suleqatigiissitsisullu aningaasaqarnermut akileraartarnermullu ataatsimiititaliami ilaasortat Nuummi, Ilulissani Qaqortumilu mittarfiit pillugit inatsissatut siunnersuutip itigartitsissutigineqarnissaa innersuussutigaat. Ataatsimiititaliap isumaliutissiissutaani ataasinngornermi unnukkut saqqummersumi tamanna allassimavoq.

Nunatta oqaluttuarisaanerani sanaartornissamut aningaasaliinerit maannamut annersaat, Inatsisartuni ilaasortat sisamanngornermi aappassaaneertussaavaat, Inatsisartunilu oqallisiginninneq sakkortulisinnaavoq.

Partiimmi inatsisissatut siunnersuut pillugu isumaqatigiinngitsut, aningaasaqarnermut akileraartarnermullu ataatsimiititaliap apeqqummik suliarinninnerani allassimavoq. Ataatsimiititaliami Siumut Demokraatillu amerlanerussuteqarlutik siunnersuutip akuerineqarnissaa innersuussutigaat, ikinnerussuteqartullu tassa Inuit Ataqatigiit Suleqatigiissitsisullu siunnersuut itigartitsissutigeqquaat.

Siumut, Nunatta Qitornai Atassullu naalakkersuisoqatigiilernermut atatillugu Nuummi Ilulissanilu mittarfinnik 2200 meterimut alliliinissamut Qaqortumilu nunap immikkoortuani 1500 meterinik takissuseqartumik mittarfiliornissamut Demokraatit tapersiinissamut isumaqatigiissuteqarput.

Taamaammat ataatsimiititaliami Siumut Demokraatillu tapersiinissaat ilimanaateqarpoq. Partiittaaq danskit Nuummi Ilulissanilu mittarfiliortiternermut aningaasaleeqataaniarnerat taperserpaat.

AAMMA ATUARUK Løkke Nuummi Ilulissanilu mittarfinnik piginneqataarusuttoq

AAMMA ATUARUK Koalition og Demokraterne laver skriftlig aftale om lufthavne

Akerliliisut qiviaraanni Inuit Ataqatigiinnit ataatsimiititaliamut ilaasortaatitat assigiinngitsorpassuarnik nangaassuteqarput, partiillu ilaasortaatitaa ilaatigut ima oqarpoq:

- Partiit allat Naalakkersuisulluunniit mittarfinnut tunngasunik isumaqatiginninniarnernik pimoorussanik aggersaasimannginnerat uggornartutut isigaarput. Ataatsimiititaliani sulineq paasissutissanik amikkittoortuarfiulluni ingerlanneqarpoq, isumaqatiginninniarnertullu iluseqanngitsumik ingerlanneqarsimallutik.

Suleqatigiissitsisut inatsimmut akerliunerminni ilaatigut ima tunngavilersuipput:

- Isumaqarpugut taama annertutigisumik akiitsoqalernissaq ammanerusumik pissuseqarfineqartariaqaraluartoq aamma pitsaanerusumik pilersaarusiorneqarsimasariaqaraluartoq matumunnga mittarfiliortiternissamut atatillugu, Suleqatigiissitsisut ilaasortaatitaat isumaliutissiissummi allappoq.

AAMMA ATUARUK Ilulissani mittarfissamut VVM-imik nalunaarusiaq Naalakkersuisut akueraat

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat