Mittarfilioqatigiittussanut aningaasaliissutissat akuersissutigineqarput

Ilulissani, Nuummi Qaqortumilu mittarfiliornissamut pilersaarutip piviusunngornissaa qanilliartorpoq. Naalakkersuisummi mittarfinnut pingasunut suliaqartussamik ingerlatitsivimmik pilersitsinissamut aningaasaliinissamut innersuussutaat Aningaasaqarnermut Akileraartarnermullu Ataatsimiititaliamit akuerineqarpoq.

Allattoq Thomas Munk Veirum

juunip 13-at 2016 14:16

Ilulissani, Qaqortumi Nuummilu mittarfiit nutaat aktianik piginneqatigiiffimmit nutaamit sanaartortinneqassapput.

Mittarfinnut sanaartortussap pilersinneqarnissaanut 200 millionit koruunit aningaasaliissutigineqartussat, Aningaasaqarnermut Akileraartarnermullu Ataatsimiititaliamit akuersissutigineqarput. Aningaasallu taakku Nukissiorfimmut atukkiussassatut immikkoortitanit aaneqassapput.

Mittarfiilli sanaartorneqalernissaat ataatsimiititaliamit matumani akuersissutigineqanngilaq.

Ingerlatseqatigiiffimmilli mittarfiliornikkut misilittagalimmik pilersitsinissamut Naalakkersuisut naatsorsuuteqarnerat Aningaasaqarnermut Akileraartarnermullu Ataatsimiititaliamit taperserneqarpoq.

Aamma atuaruk ARCTIC CIRCLE Mittarfiit allanngortitsilluinnassapput

Ingerlatsivimmut 200 millionit koruuninik aningaasaleeqataanissaq pisariaqartoq, Aningaasaqarnermut Akileraartarnermullu Ataatsimiititaliap aalajangiineranik Naalakkersuisunut ilisimatitsissutaani tamanna atuarneqarsinnaavoq.

Aningaasaleeqataanikkummi aningaasaliisussat allat ingerlatitsivimmut ilanngunneqarnissaat qulakkeerneqassaaq.
Aningaasaqarnermut Akileraartarnermullu Ataatsimiititaliap innersuussutaa Naalakkersuisoqatigiinnit akuerineqarpoq, suleriaaserli illuatungiliuuttunit Inuit Ataqatigiinnit akerlerineqarpoq.

Nukissiorfiit sanaartorniarneranut pilersaarutaannut aningaasaliissutissaagaluit mittarfinnut atuinnarneqarniarnerat Inuit Ataqatigiinnit isornartorsiorneqarpoq, sanaartornikkummi pilersaarutigineqartut inuiaqatigiinnit pisariaqartinneqarput, illuatungiliuuttut isumaqarput.

Aamma atuaruk Naalakkersuisut fastholder planen om nye landingsbaner

Aamma atuaruk Mittarfiit ilaat pilersinneqarsinnaapput

Aamma atuaruk Sara Olsvig: Minutsinik 30-nik periarfissippaatigut