ARCTIC CIRCLE Mittarfiit allanngortitsilluinnassapput
Mittarfiillu nutaat takornarianik sullissisunut nutaanik periarfissiissasut, takornariat sammineqarneranni, oqalugiartussatut sassartitat tamarmik isumaqatigiipput.
- Nuup Ilulissallu Kalaallit Nunaannut isaarianngortinneqarniarnerat nuannaarutigisorujussuuvarput, umiarsuarmik angallassisumi Norgemeersumi Hurtigrutenimi tunisassianik ingerlatsisoq, Jørn Henriksen oqarpoq.
Ilaasut, orsussaq nerisassallu umiarsuarmut assartortissaat ajornannginnerulissasoq, Nuullu Ilulissallu ornitassatut pingaarneruleriartussasut, Henriksen isumaqarpoq.
Aamma atuaruk Islandip præsidentia: Ataatsimeersuarneq oqaluttuarisaanermut pingaarutilik
Ilinniartitaaneq pingaartinneqartoq
Visit Greenlandip pisortaata, Anders Stenbakkenip takornarniat pillugit saqqummiussamini takornarniat tikittartut amerliartornerat oqaatigaa. Takornariartitsinerulli iluani ataatsimut ineriartortitsisoqarnissaa aamma pingaartippaa.
Tamannalu Air Greenlandimit isumaqatigineqarpoq. Mittarfiimmi timmisartullu takornariartitsinermi naammanngillat. Aamma akunnittarfiit, takornarianut ornigarneqaatit sullissisullu pikkorissut pisariaqartinneqartut, Air Greenlandimit erseqqissaatigineqarpoq.
Aporfiillu taakku Issittumi tamani aporfiupput. Takornarianik sullissisut ilinniarsimasut amigaataapput, tamannali iliuuseqarfigineqarniarpoq.
Nunatsiavummi takornarianik sullissisunik ilinniagaqartitsinermut suliniuteqartut, Nunatsiavummi takornariaqarnermut ministerip Sean Lyallip oqaatigaa.
Aamma atuaruk Takornarialerinermi kandidatinngortoqarsinnaanngorli
Nunatsinnilu aamma ilinniagaqartitsisoqarniartoq, Anders Stenbakkenip oqaatigaa. Tamaanimi takornarianut nassuiaassisunik ilinniarsimasunik amigaateqarpoq.
Takornariaqarnermut allannguutaalluinnartoq
Ilinniarsimasunillu sullissisoqarnissaq pingaaruteqarpoq. Mittarfiimmi nutaat Nunatsinni timmisartukkut angallassineq allanngortilluinnassagaat, Air Icelandip pisortaa Arni Gunnarson isumaqarpoq.
Takornariallu timmisartunik angallassisunit pingaartinneqarput. Air Greenlandimeersummi Jacob Nitter Sørensenip oqarneratut, Nunatsinni innuttaasut ikiliartormata, takornarniat ukkatarineqarput.