Inuussutissarsiutit Ilinniarneq

Takornarialerinermi kandidatinngortoqarsinnaanngorli

Takornarianik angallassisutut akissarsiarissaarfiunngitsut naammagiinnarnagit angusaqarusussuseqarnerulertariaqalertugut Anders Stenbakken isumaqarpoq.

Allattoq Jonas Løvschall-Wedel, Ane-Marie Petersen

oktobarip 02-at 2015 13:09

Takornarialerinermi kandidatinngorniarfimmik nunatsinni ilinniarfeqalerli. Visit Greenlandimi pisortaq Anders Stenbakken taama isumaqarpoq.

- Takornarialerinermi angusaqarusussuseqarnerusariqarpugut. Angallassisatoqarnissaq taakkualu kalaaliunissaat kisiisa pinnagit, Anders Stenbakken oqarpoq nangillunilu:

- Ullumikkut takornariagut eqqarsaatigalugit angallassisut aamma amingareerput.

Læs også Partii Naleraq: Takornarianik angallassisartut avataaneersut atornagit

Anguniakkat qaffasinnerit

Ilinniartut aasaanerani atuanngiffeqaraangata takornarianik angallassisutut sulisoriniarneri ajornakusoortartoq taassuma aamma oqaatigaa.

Takornarialerisuuneq ukiup ilaannaani suliuffiusinnaasoq aningaasarsiarissaarfiugitsorlu pisortap aamma nassuiaatigaa. Taamaammat taamatut sulisuunissaq paggattariaqanngikkipput, aamma oqarpoq.

Kinguaariit tullii Nuummi ilisimatusarfimmi takornarialerinermik kandidatinngorniarsinnanngortillugit, angusaqarusussuseqarnerusariqartugut isumaqarpunga.

Aamma atuaruk Takornarialerisoq: Ilisimasaqarneq sakkugissallugu nalituujuvoq

Tuniniaanermik, pisisartut immikkualuttunut qanoq agguataarneqarsinnaanerannik takornarialerinermilu ilinniarneqartartut Kalaallit Nunaannut tulluartunngorlugit ilisimatusarfigisinnaangortikkusuppai.

Nunatsinniiginnartitserusuppoq

Aammalu taama ittumik ilinniarfiusinnaasumik pilersitsinikkut Nunatsinnik qimatsisusaagaluanik nunatsinniiginnarsitsisinnaasumik, ilisimasanik tunniussissinnaasunik inuussutissarsiumilu ineriartorsiusumi sulisinnaasunik ilinniartitsisoqarsinnaasoq, Visit Greenlandip pisortaa isumaqarpoq.

- Ilinniarfilioqisa, suut pingaarnertut inuussutissarsiorfiusinnaanerannik tikkuussisussamik ilisimatusartiutigisumik, aammalu nunaqqatitta ilaasa maaniiginnarnisaannut peqqutaasussamik.