Mittarfiit tallilerneqarnissaat Naalakkersuisut aalajangiusimavaat
Nuummi, Qaqortumi Ittoqqortoormiinilu mittarfiit ukioq 2018-ip naalernerani piareeqqassasut Naalakkersuisut pilersaarutigaat.
- Uani aallartikkatta piffissalersuummik sananikuuvugut, assersuutigalugu Qaqortumi mittarfissaq pillugu pilersaarusiorneq kvartalimi siullermi aallartereerpoq, attaveqaqatigiinnermut naalakkersuisoq Knud Kristiansen oqarpoq, nangillunilu:
- Taamaammat pilersaarusiorneq aallartereertutut oqaatigisinnaavarput, taamatuttaaq Ilulissani mittarfissaq pillugu pilersaarusiorneq ukiormanna kvartalimi siullermi aallartereerluni, naalakkersuisoq Knud Kristiansen oqarpoq.
Ilulissani mittarfiup tallinissaa pisariaqartinneqarpoq
Ilulissani Nuummilu mittarfiit tallilerneqassapput, 2200 meterisut takitigisunngortillugit, Nuummi 2018-imi Ilulissanilu 2019-imi.
Qaqortumi 1499 meterisut takitigisumik 2018-ip naalernerani mittarfeqalernissaa attaveqaqatigiinnermut naalakkersuisup siunniuppaa.
Tasiilami Ittoqqortoormiinilu silasiorfiit nutaat napparneqareerpata 2018-ip naalernerani mittarfeqalernissaat naatsorsuutigineqarpoq.
Tassalu Tasiilami ujaraaqqanik qallersukkamik 1199 meterisut takitigisumik mittarfeqalernissartik naatsorsuutigisinnaavaat.
