Sara Olsvig: Minutsinik 30-nik periarfissippaatigut

Attaveqarnermut sinaakkutissatut aningaasaliissutissat pillugit naalakkersuisoqatigiit, Siumut, Demokraatit Atassullu isumaqatigiissuteqarput.

Inuit Ataqatigiit isumaqatigiissutigineqartunut akerliuvinngikkaluarlutik, suliap ingerlanneqarneranut iluarinninngitsut, partiimi siulittaasoq Sara Olsvig oqarpoq.

Aamma atuaruk Mittarfiit naalakkersuisoqatigiinnit isumaqatigiissutigineqarput

- Aatsaat ippassaq unnukkut, nalunaaqutaq arferngup qeqqanut suli Inatsisartut ataatsimiittarfianni taaseqattaarluta, pappilissanik aggiussisoqarpoq, taavalu atsioqataanissatsinnut aalajangiinissamut nalunaaquttap akunnerata affaanik periarfissinneqarluta, Sara Olsvig KNR-imut oqarpoq.

Ilumoorsaarnerunngitsoq

Isumaqatiissutigineqartullu iluamik paasiniarnissaannut piffissaliussaq sivikippallaartoq, Inuit Ataqatigiit siulittaasuat isumaqarpoq, suliallu taama ingerlanneqarneranut naammagittaalliorluni.

- Taamatut saaffiginnikkaluarnerat ilumoorsaarnertut taaneqarsinnaanngitsoq isumaqarpunga, aammalu suleqatigiinnikkumassuseqavinnertut taaneqarsinnaanngitsoq, Sara Olsvig oqarpoq.

Isumaqitiissutigineqartulli Inuit Ataqatiinniit akerlerineqanngillat. Pappilissat sisamanngormat tunniunneqartut allaqqitassiaapput, taakkulu Sara Olsvigip kisiisa takoreerpai. Imarisaali qimerluualaareerlugit iluarisimaarinnippoq.

Taamaattoq naalakkersuisoqatigiit atsiugaat sumut atorneqassanersoq paasiuminaatsippaa.

- Sanaartornermut ataatsimiititaliap isumaliutissiissutaani isumaqatigiissutaareersut, Inuit Ataqatigiinniit aamma isumaqataaffigalugit atsioqataaffigisavut, taakkunanngaanniit allaanerungaanngillat. Taamaammat naalakkersuisooqatigiit atsioqatigeeqqinnissaminnut pisariaqartitsisimammata eqqumiigilaarpara, Inuit Ataqatigiit siulittaasuat Sara Olsvig oqarpoq.