Mittarfiliortiternissamut danskit aningaasaleeqataarusunnerat partiit ima isummerfigaat
Sapaatip akunnerata siuliani partiit isumaqatigiissummut qanoq isummernerat Inuit Ataqatigiit aallarniisoralugit tusagaqarfigissavarput. Taakku Danmarki qanoq piumasaqaateqarnerat sukumiinerusumik paasisaqarfigerusuppaat.
- Siunnerfeqaqatigiinnermik atsioqatigiissimagaluarluni atugassarititaasut piumasaqaataasuusussallu nunatsinniit, illuatungaanilu Danmarkip piumasaqaatiginiagai itinerusumik ataasinnguamilluunniit inississorneqarsimanngillat, Inuit Ataqatigiit siulittaasuat Sara Olsvig oqarpoq.
AAMMA ATUARUK Kielsen politikkikkut uivertoqarnerani aavariarluni aallartoq
AAMMA ATUARUK Siumumi avissaartuuttoqanngilaq
Siumukkormiut isumaqatigiissuteqarneq nuannaarutigaat.
- Sanaartugassat angisuut piviusunngortinneqarnissaannut tunngavissatut tunngavigineqarsinnaasutullu isigalugit nalilersoqqissaarusullugit tapersersorlugit nalunaaruteqarnikuuvugut, Karl-Kristian Kruse oqarpoq.
Naalakkersuisunili ilaasortap Siumumeersup Erik Jensenip isumaqatigiissusiorneq tapersinngilaa. Siumup Sisimiuni immikkoortortaqarfiata aamma akerleraa, namminersulivinnissamummi Danmarki kinguarsaanerarlugu.
Nunattali Qitornai ernumassuteqanngitsut siulittaasoq Vittus Qujaukitsoq oqarpoq.
- Danskit naalakkersuisui ilisarisimavagut aamma ukiorpassuarni suleqatigisarnerini tassuunartaatigut ernumassutiginngilara nunatta nammineersinnaaneranut pitsaanngitsumik kinguneqartitsisoqarnissaa taanna uanga aarleqqutiginngilara, Vittus Qujaukitsoq oqarpoq.
Naalakkersuisoqataasup aappaata, tassa Atassutikkut suleqatigiinnissamut kaammattuipput.
- Niueqatigiinniarpalaartumik suleqatigiinniarpalaartumillu naaggaartoreerlugu pinngikkaluarlugu isumaqarpunga tamarmik ammaffigineqartariaqartut, Atassutip siulittaasua Siverth K. Heilmann oqarpoq.
AAMMA ATUARUK Inuussutissarsiutinut aningaasaliineq iluatsitsilluartitsissasoq
Danskillu taama tapersiinerat aningaasaleerusuttunut allanut aqqutissiuisoq Demokraatit isumaqarput.
- Tamatumunnga ammaassisoqarpoq. Aamma Danmarkimi soraarnerussutisiassanut aningaasaateqarfinnut, taakkumi naalagaaffimmit qularnaveeqqusiisoqarnera, imminut akilersinnaasussaqarnera aningaasaliisoqartariaqarneralu maanna takusinnaalerpaat, Justus Hansen oqarpoq.
AAMMA ATUARUK Danmarkip piumasaqaatiginiagai suuppat?
Suleqatigiissitsisullu mittarfiliortiternissamut suliami ammanerusoqarnissaa ujartorpaat. Danmarkilli mittarfiliortoqarnissaanut aningaasaleeqataarusussuseqarnera nuannaarutigalugu.
- Naalagaaffeqatitsinnit Danmarkimit tamanna takutitsilluarneruvoq, tassami aningaasaliissutit mittarfiliortiternermut taarsigassarsinermut erniakinnerulersitsissapput, Suleqatigiisitsisunit Tillie Martinussen oqarpoq.
Mittarfiliortiternissamulli aningaasaliissutiginiarneqartut Inatsisartuni Folketingimilu ilaasortanit akuersissutigineqaqqaartussaapput.
AAMMA ATUARUK Isumaqatigiissusiorneq nunatsinni aningaasalersuinissamut pilerinarnerulersitsissaaq
AAMMA ATUARUK Løkkemut isumaqatigiissut Erik Jensenip Naalakkersuisuni taperserumanngikkaa