Løkkemut isumaqatigiissut Erik Jensenip Naalakkersuisuni taperserumanngikkaa

Danskit aningaasaliissuteqarnissaat pillugu Kim Kielsenip ministeriunermut ataasinngormat isumaqatigiissutiginiagaa isumaqataaffiginagu aalisarnermut, piniarnermut nunalerinermullu naalakkersuisup Siumumeersup Erik Jensenip Naalakkersuisut arfininngormat ualikkut ataatsimiinneranni erseqqissaatigaa.

Danskilli ministeriunerannut isumaqatigiissut arfininngormat ullaap tungaani nalunaaqutaq qulinut taamatut isikkoqartillugu tapersersorlugu Naalakkersuisuni amerlanerussuteqartut isumaqatigiissutigaat. Ilaasortalli marluk isumaqatigiissut isumaqataaffiginagu ataatsimiinnermit imaqarniliamut ilannguteqquaat.

AAMMA ATUARUK Akerliusut sakkortuuliornerat Kim Kielsenip nuanniilliutigigai

Erik Jensen Siumumut Inatsisartunullu ilaasortat allat assigalugit Qeqqata Kommuniani tunuliaqutaqarnini pissutigalugu  Naalakkersuisut nutaanik mittarfiliortiternissamik kissaateqarnerannut tunngatillugu ajornakusoortumik inissisimavoq.

Nutaanimmi mittarfiliortiternissaq Qeqqata Kommunianit pitsaasutut isigineqanngilaq, tamatuma Kangerlussuarmi mittarfiup qulimiguulinnuinnaq mittarfinngortinneqarneranik kinguneqarnissaa ilimanaateqartupilussuummat, tamannalu suliffinnik amerlasuunik annaasaqarnermik kinguneqassammat.

Erik Jensenip saniatigut aningaasaqarnermut naalakkersuisup Pele Brobergip danskit ministeriunerannut isumaqatigiissutissamut isumaqataannginnini imaqarniliamut ilannguteqquaa.

AAMMA ATUARUK Koalitionspartnere støtter dansk håndsrækning

AAMMA ATUARUK Kalaallit Airports 1 milliard koruuninik sipaaruteqarsinnaasoq