Naalakkersuisoqataasut danskit aningaasaliinerat taperseraat
Danmarkilu suleqatigineqartareermat suleqatigeqqinnissaanut ernumanartoqanngitsoq Nunatta Qitornai isumaqarpoq
- Danskit naalakkersuisui ilisarisimavagut aamma ukiorpassuarni suleqatigisarnerini tassuunartaatigut ernumassutiginngilara nunatta nammineersinnaaneranut pitsaanngitsumik kinguneqartitsisoqarnissaa taanna uanga aarleqqutiginngilara, Vittus Qujaukitsoq oqarpoq.
AAMMA ATUARUK Løkke Nuummi Ilulissanilu mittarfinnik piginneqataarusuttoq
AAMMA ATUARUK Danskit mittarfiliortiternernut akuunissaat Løkkep uppernarsaraa
Naalakkersuisuutitaqartut aappaata, tassa Atassutikkut, isumaqatigiissuteqarneq aamma taperserpaat.
- Niueqatigiinniarpalaartumik suleqatigiinniarpalaartumillu naaggaartoreerlugu pinngikkaluarlugu isumaqarpunga tamarmik ammaffigineqartariaqartut, Atassutip siulittaasua Siverth K. Heilmann oqarpoq.
Danmarki Nuummi Ilulissanilu mittarfinnut katillugit 1,6 milliardit koruuninik aningaasaliissuteqassasoq, mittarfinnullu piginneqataassutaa 33,3 procentiussasoq Naalakkersuisut siulittaasuata Kim Kielsenip danskit ministeriuneratalu Lars Løkke Rasmussenip ippassaq isumaqatigiissummi atsioqatigiissutigaat.
Aningaasanik atorniassatilluni periarfissat pitsaanersiorneqarnissaat Nunatta Qitornaanit pingaartinneqarpoq:
- Erniat sapinngisamik appasinnerpaaq anguniartariaqarpagut taavalu nunat suleqatigisassagut tassani aamma mianersorfissaqarput illersornissaq kisiat eqqarsaatiginagu kisianni naliginnaasumik sunut allanut tamanut qanoq inuiaqatigiinnut nunatsinnullu kalluuteqarsinnaanerat aamma mianersuutassaagami.
AAMMA ATUARUK Danskit mittarfinnut akuliunnerat nunasiaataaneruvoq
AAMMA ATUARUK Mittarfiliortiternermi danskit peqataatinneqassappata akuerisinnaanngilluinnarparput
Mittarfissat kisimik aningaasaliiffigineqanngillat. Inuussutissarsiornikkummi inerisaanissamut aamma aningaasaliisoqarnera ippassaq atsioqatigiissutigineqarpoq. Tamanna Atassutikkut iluarisimaarpaat.
- Inuussutissarsiutinut allanullu periarfissanik pitsaasunik siunertaqarluni aningaasaliiniarpalunnerat tusaallugu isumaqarpunga ajoriinnagassaanngitsumik iliuuseqarneq pakatsinartunngortinneqartariaqanngitsoq, Atassutip siulittaasua Siverth K. Heilmann oqarpoq.
