Danskit mittarfiliortiternernut akuunissaat Løkkep uppernarsaraa

Lars Løkke Rasmussen Twitterimi taama allappoq.

- Nuuliarlunga timmisartorpunga, Kim Kielsen ullumikkut kingusinnerusukkut ataatsimeeqatigissavara Kalaallit Nunaanni mittarfiliortiternerup aningaasalersuiffiginissaanut Danmarkip peqataanissaa isumaqatigiissutigissallutigu, ministeriuneq allappoq.

Nuummi, Ilulissani Qaqortumilu mittarfinnik sanaartornissamut aningaasaliinissat oqallisiginiarlugit ministeriunerup naalakkersuisut siulittaasuat Kim Kielsen ullumi kingusinnerusukkut ataatsimeeqatigissavaa.

AAMMA ATUARUK Naak politikkikkut sammiveqanngittoqaraluartoq Løkkep ataatsimeeqatiginissaa piviusunngussaaq

Taakku ataatsimeereerunik ataatsimoorlutik nal. 13.45 tusagassiortunik katersortitsissapput, Ministeriuneqarfik taama paasissutissiivoq.

Ministeriunerup mittarfiliortiternerit pillugit Kim Kielsenimik oqaloqateqariartorluni Nuummut ullumikkut tikinnissaa nalunaarutigineqareersorlu Partii Naleraq naalakkersuisooqatiginnit sapaatiummat tunuarpoq.

Danskit naalagaaffiata nunatsinni attaveqarnermut aningaasaleeqataasinnaanera partiip ilaatigut isumaqatiginngilaa.