Siumut immikkoortortaqarfia: Danskit mittarfinnut akuliunnerat nunasiaataaneruvoq
Lars Løkke Rasmussen ataasinngorpat Nuummut tikissaaq tassani Siumut Naalakkersuisullu siulittaasuat, Kim Kielsen danskit mittarfinnut pilersaarutini peqataasinnaanissaat pillugu ataatsimeeqatigissavaa.
Danskit kalaallillu atorfilittaasa Danmarkip mittarfinnut nutaanut katillugit 3,5 milliardit koruuneqartussat aningaasaleeqataalluni ikiuussinnaaneranut periarfissat misissorpaat.
Danmarkilli pingaarutilimmik inissisimalersinnaanera Siumut Sisimiuni immikkoortortaata nuannaarutiginngilaa.
- Siumut Sisimiut akuersaarsinnaanngilluinnarpaa Nunatta namminiilivinnissaa danskit naalagaaffiata mittarfissuassanut Nuummi Ilulissanilu aningaasaleeqataaniarnermikkut kinguarsalermassuk, nunasiaataanerullu nangeqqiinnarneqarnissaanut aqqutissiuunneqalermat, Siumut immikoortortaani siulittaasoq, Dorthea Isaksen tusagassiuutinut allappoq.
AAMMA ATUARUK Danskit mittarfiliortiternissanut peqataalerunartut
Danskit akuusinnaanerat Danmarkip nunatsinnik namminiilivitsitsinissamut piareersimannginneranik ersarissumik takussutissiisoraa.
- Tamatumami ersersippaa qanoq danskit nunarput pisuussutaalu iluatigitigineraat ilangeeqataaffigerusutsigineraallu, inuiaallu naqisimaneqartuarnissaat qulakkeerniartigigaat.
Tamanna ilutigalugu illoqarfiit pingaarnersaanni parteeqatiminut tusangiasaaruteqarpoq.
- Siumup politikkeraa inuiaat nammineersut nunami tunniussinnaasai akisussaassuseqartumik atorlugit ineriartortut imminnut napatissinnaalerlutillu aqussinnaalersimasut. Tamannali kattuffiup puigorluinnarsimagunarpaa, isornartorsiuilluni allappoq.
Nutartigaq 18:40
Danskit naalagaaffiata mittarfinnut aningaasaliinissamik isumaqatigiissuteqarfigineqartinnagu, isornartorsiuteqartunut oqaaseqarumanani, Naalakkersusiut siullittaasuat Kim Kielsen oqarpoq.
AAMMA ATUARUK Lars Løkke Nuulialersoq
