Danskit mittarfiliortiternissanut peqataalerunartut

Danmarkip ministeriunera Lars Løkke Rasmussen, nunatsinnut ataasinngorpat septembarip ulluisa qulinganni tikeraassaaq.

Kalaallit Nunaanni mittarfiliortiternissami danskit aningaasaleeqataasinnaanerannut tunngasut, inuussutissarsiornikkullu suleqatigiinnerit nukittorsarneqarnissaat, ataatsimeeqatigiinnissami tassani oqaluuserineqassapput.

Kim Kielsen Lars Løkke Rasmussenilu tusagassiortunik Hans Egedep illuani ataasinngorpat nalunaaqutaq 13:45 katersortitsissasut, Namminersorlutik Oqartussat KNR-imut paasissutissiipput.

Danskillu mittarfiliortiternernut peqataanissaannut isumaqatigiissummik saqqummiussisoqarnissaa ilimanartoq, KNR-imi tusagassiortup Ivik Kristiansenip tallimanngornermi ullup qeqqanut radioaviisimi oqaatigaa.

AAMMA ATUARUK Lars Løkke Nuulialersoq

Tusagassiortunik ataasinngorpat katersortitsippata qanoq pisoqassanersoq pillugu suut nalunngilagut.

- Maanna ilisimasaqarujussuanngilagut.

Kisianni danskit Qaqortumi, Nuummi Ilulissanilu mittarfiliortiternissani aningaasaleeqataasinnaanissaannut misissuisoqarnera tikeraartoqarnissaanut tunngaviuvoq.

Tusagassiortunillu maanna aggersaasoqareermat, Naalakkersuisut siulittaasuata ministeriunerullu danskit mittarfiliortititernissanut taperseeqataanissaannut isumaqatigiissummik saqqummiussinissaat periarfissat ilaanniippoq.

Taamaattoqassappalli danskit qanoq taperseeqataaniarnerannut tigussaasunik paasissutissaateqanngilagut. Kisianni Namminersorlutik Oqartussanit naalagaaffimmiillu qaffasissumik atorfilinnik 34-nik ilaasulimmik suleqatigiissitaqarpoq, taakkualu periarfissanik assigiinngitsunik misissuipput.

Lars Løkke Rasmussenilu nunatsinnukartussaammat, tusagassiortunillu katersortitsinissamut aggersaareermat, arlaannik isumaqatigiissuteqartoqarsimarpasippoq.

AAMMA ATUARUK Danskit aningaasalersuisinnaanerat atorfilittat 34-t misissoraat

Danskit mittarfiliortiternernut peqataanissaannut misissuisoqarneranut suna pissutaava?

- Naalgaaffeqatigiinneq pillugu Savalimmiuni aasaq ataatsimiinnerup malitsigisaanik misissuititsisoqarpoq. Mittarfiliortiternerit nunanut allanut sillimaniarnermullu politikkikkut sunniuteqarsinnaanerat danskit naalakkersuisui naliliisut taamani oqaatigineqarpoq.

Nunanut allanut sillimaniarnermullu politikki danskinit oqartussaaffigineqarput, aamma kinamiut mittarfiliortiternernnut peqataasinnaanerat amerikamiunit danskiniillu ernummatigineqartoq ataatsimiinneq sioqqullugu oqaatigineqarpoq.

Taakkulu pissutaallutik, atorfilittanik inuttaqartumik suleqatigiissitamik danskit suliniummut qanoq ikiuisinnaanersut pillugu misissuisussamik piffissaq kingulleq atorlugu pilersitsisoqarpoq.

Inatsisartummi mittarfiliortiternissat ukiakkut ataatsimiinnerminni isummerfigisussaavaat, danskillu taperseeqataanissaannik isumaqatigiissuteqartoqarsimappat, mittarfiliortiternissanut suliniummut sinaakkutissat allanngorujussuarsinnaapput.

Inatsisissatut siunnersuut sivisuumik allanngorujussuanngilaq, politikerillu suna isummerfigissanerlugu sivisuumik nalunagu. Danmarkili aningaasaliissappat, nunarpullu nunat tamalaat taarsigassaqartitsisarfiinut saaffiginnittariaqarunnaassappat, Lars Løkke Rasmussenip mittarfiliortiternissanut sinaakkutit allanngorterujussuarsinnaavai.