Mittarfiit: Danskit aningaasalersuisinnaanerat atorfilittat 34-t misissoraat
Nunatsinni mittarfiliortiternissamut danskit aningaasaliisinnaanerannut periarfissat atorfilittanit Nunatsinneersunit Danmarkimeersunillu katillugit 34-nit misissorneqaleruttorput.
Nittartakkatigut nutaarsiassiisarfik Altinget Arktis taama allaaserisaqarpoq.
Nunatsinni naalakkersuisoqarfinnit sisamanit assigiinngitsunit atorfilittat 13-it peqataapput, Naalakkersuisut siulittaasuata naalakkersuisoqarfiani pisortaq, Søren Hald Møller taakkunani ilaavoq.
Danmarkimi ministeriuneqarfimmit, aningaasaqarnermut ministereqarfimmit inuussutissarsiornermullu ministereqarfimmit atorfilittat 21-t peqataapput.
AAMMA ATUARUK Danskit mittarfinnut aningaasaliinissaanut periarfissat Kielsenip Løkkellu misissorniarpaat
Naalakkersuisut siulittaasuata Kim Kielsenip danskillu ministeriunerata Lars Løkke Rasmussenip danskit aningaasaliisartuisa Nuummi, Ilulissani Qaqortumilu mittarfinnik sanaartornissamut aningaasaleeqataasinnaanerannut periarfissat misissorniarlugit Naalagaaffeqatigiit Savalimmiuni juunimi ataatsimiinneranni isumaqatigiissutigaat.
Suleqatigiissitat siunnersuutitik Nunat Avannarliit Siunnersuisooqatigiivisa Norgemi oktobarimi ataatsimiinnginneranni saqqummiutissagaat Naalagaaffeqatigiit ataatsimiinneranni oqaatigineqarpoq.
Suleqatigiissitani suliakkiissummi allassimavoq mittarfinnut aningaasaliinissamut inatsisitigut akuersissuteqartoqarpat suleqatigiissitat suliaat naammassineqartutut isigineqassasoq, aamma illuatungeriinnut allanut tunngatillugu.
AAMMA ATUARUK Mittarfiliortiternissami suleqatissagut nammineq suli aalajangersinnaavagut
AAMMA ATUARUK Borgmesterit pingasut mittarfinnut pilersaarutinut nangaasoqarneranik isornartorsiuisut
AAMMA ATUARUK Kinap soqutiginninneranut ernumaneq ingattarserneruvoq
