Danskit mittarfinnut aningaasaliinissaanut periarfissat Kielsenip Løkkellu misissorniarpaat
Nuummi, Ilulissani Qaqortumilu mittarfittaassanut Danmarki aningaasaleeqataasinnaanersoq Ministeriuneq Naalakkersuisullu siulittaasuat qulaajarusuppaat.
Pilersaarutit malillugit mittarfiliortiternernut inatsit Inatsisartunit ukiaru aappassaaneerneqannginnerini inerniliisoqarsimassaaq.
Taamak Kielsen Løkkelu nalunaarput, mittarfittaassat nunanut allanut upalungaarsimanermullu politikkimut danskinit akisussaaffigineqartunut ilaanersut piffissami sivisuumi oqallisigineqareertorlu.
Naalakkersuisut naaggaarput, taamaattorli danskit ministeriunerat nunanullu allanut ministeriat apeqqusiipput, suliffeqarfik Kinamiut naalagaaffiata pigisaa mittarfittaassanik sanaartornermut neqeroorusiorsinnaanermut akuerisaanerata kingorna.
AAMMA ATUARUK Kineserit aarleqqutigigaat
Tamannalu Løkkep Kielsenillu pingasunngornermi isumaqatigiissutigisaannut sunniuteqarsimavoq.
- Mittarfiliortiternissamut suliniut ataatsimut isigalugu nunanut allanut upalungaarsimanermullu politikkikkut Kalaallit Nunaanniinnaanngitsoq sunniuteqarsinnaavoq, kinguneranillu Kalaallit Nunaata aningaasaqarnerani pisuussuterpassuit ukiorpassuarni matoqqatinneqassallutik.
AAMMA ATUARUK Mittarfiliornissamik suliniutissaq ukiuni 10-ni oqallisigineqareerluni piariilersoq
Nuannaarutigaara Naalakkersuisut siulittaasuat, Kim Kielsenilu ullumikkut isumaqatigiikkatta, ataatsimoorluta misissuinermik suliaq aallartisassalluga, Løkke oqarpoq.
Taamaattorli mittarfittaassanut atatillugu Danmarkip suleqatanissamut piareeqqanera nuannaarutigaa.
- Tamanna tunngavigalugu danskit mittarfiliortiternissanut aningaasaleeqataasinnaanerannut periarfissat pillugit naalagaaffik nuannersumik suleqatiginissaanut Naalakkersuisut piareersimapput, Kim Kielsen oqarpoq.
Naqqiut juunip 14-ia nal. 12.55: Oqaaseqatigiit ukua allaaserisami ilaagaluarput: Suliarli nunami namminermi politikkimut tunngasuuneranut isummani Kielsenip attappaa. Taanna eqqortuunngilaq. Mittarfiliortiternissaq aningaasalersornissaa nunatsinni namminermi aalajangigassaasuuneranik apeqqut, Kim Kielsenip qanoq isummerfigineraa, nalunaarummi ersinngilaq.
Kim Kielsenili nalunaarummi ima oqarpoq:
- Mittarfissanik sanaartornissamut suleqatigiinnissamut oqallinnitsinni kalaallit danskillu oqartussaasuia akornanni aalajangiisinnaanermut agguataarineq atuuttoq tunngaviuvoq kiisalu naligiissumik suleqatigiinnissamut kissaateqarnerput..
AAMMA ATUARUK Kinamiut mittarfinnik suliaqartinneqarnissaanik USA mianersoqqusivoq
AAMMA ATUARUK Nuuk Københavnilu Kinamut piareersimasariaqarput
AAMMA ATUARUK Kinamiut sanaartornissamut neqerooruteqarnerannut danskit akuliukkumasimanngillat
