Nuuk Københavnilu Kinamut piareersimasariaqarput
Attaveqaqatigiinnikkut Kina saassussisaleraluttuinnarpoq. Tamatuma kinguneraa suliniutit siunnersuutillu amerliartuinnartut Issittumi suliniutissanik kalaallit danskillu oqartussaasuisa saqqummiiffigineqartarnerat.
Issittoq taamatullu Kalaallit Nunaat kinami præsidentip Xi Jinpingip ataqqinaatissaminik pingaartitaminik pilersaarusiornerminut ilanngussimavaa. Siilikip aqqutaa nutaaq, issittumi imaatigut aqqutit nutaat Kinamik iluaqusiisussat anguniarneqarput.
Aallartitaqarnikkut iluareqqusaarneq
Tamatuma nassatarissavaa Issittumi attaveqatigiinnermi Kinap saassusinerunissaa, Camilla T. N. Sørensen, Forsvarsakademiimmeersoq paasiniaareerluni taama oqarpoq.
- Naak akerlilersorneqarlutillu, siornatigut aporfigisartagaannik aarlerinartoqarsinnaagaluartoq - naatsorsuutigisinnaavarput Kina Issittumi anguniakkamini nutaani anguniakkani piviusunngortillattaasinnaagai, soorlu issittumi imaani aqqutit Siilikip aqqutaatut nutaatut pilersaarutigineqartut.
AAMMA ATUARUK Kina Issittumut eqqissisimanartumik iliuusissamik qinersisoq
Kinamiullu pisuussuterpassuaqarput, taamaattumik Danmark Kalaallit Nunaallu kinamiut saaffiginnikkaangasa isumaqatigiissutaasinnaasut pitsaanerpaat anguniarlugit suleqatigiittariaqarput.
- Kinamut attaveqarneq eqqarsaatigalugu isumaga malillugu Kalaallit Nunaata atorluartariaqarpaa Danmarkip sorpassuartigut misilittagarilersimasai; Kinami ukiuni aggersuni soqutiginnikkaluttuinnassaaq.
Ammasumik kinguneqartussamillu suleqatigiinnissaq innersuussutigineqarpoq
Assersuutigalugu kinamiut Kalaallit Nunaanni issittumi misissuiviliorniarnerat eqqarsaatigalugu:
- Eqqanaanngikkaanni misissuiviup tamanut ammasuunissaa, taava paasiuminaallissaaq taanna ilumut sakkutooqarnermut atorneqannginnersoq.
Taamaattumik ilisimatuup unnersuussutigaa, danskit kalaallillu oqartussaasui ammasumik, innimisuttumik kinguneqartussamillu suleqatigiissasut.
- Naggataagut Danmarkip Kalaallit Nunaatalu ataatsimut Issittumi kinamiut soqutiginnikkaluttuinnarnerat immikkut suliarisariaqarpaat.
Naalagaaffeqatigiit iluanni suleqatigiinnerit ilaannikkut tamaviaarnarsisarput, nunanullu allanut naalakkersuisuusimasup Vittus Qujaukitsup Danmark siorna ukiakkut FN-imut naammagittaalliutigimmagu pitsaajunnaarsimalluni. Naammagittaalliulli kingusinnerusukkut tunuartinneqarpoq.
AAMMA ATUARUK Kina er ivrig efter at sejle igennem Nordvestpassagen
