Kinap Sullualuk aqqutigerusukkaa
Sullualukkut angalaneq silap pissusia allanngoriartormat ajornannginnerulereerpoq.
Kinamiut angallataat Ruslandip avannaqqullugu kangianut Ruslandimut Norgemullu ukiuni arlalinni angalasareerput. Umiarsuillu 150-it missaanniittut siorna tassuunnaqquupput.
Sullualutigoorlunili Amerika Avannarlermi Europamilu niuerfinnut sukkanerusumik apuuttoqarsinnaavoq. Soorlu Shanghaimit New Yorkimukarneq sapaatit akunneranik sukkaneruvoq. Piffissarlu taanna atorlugu aningaasarsiorluartoqarsinnaavoq.
Kinamiut sikunik aserorterutaat Xuelong septembarimi sullualukkoorpoq. Angalaneq ilisimatusarnermut atasuummat, Canadamit akuerineqarsimasoq Kinamit oqarput.
Ilisimatuut kinamiut uuttuisarfeeqqanik puttasartunik aqqutikkut ikkussuisimasut maanna erserpoq. Uuttuisarfeeqqat sikup qanoq inneranut, silamut allanullu paasissutissanik Kinami qarasaasianut nassiussisarput.
Ilisimatuutulli misissuiniarneq uuttuisarfinnik ikkussuinermut ilumut pissutaanersoq isumaliutigineqarpoq. Imaassinnaavormi kinamiut qanoq qaqugulu angalanissaq pitsaanerpaajunersoq paasiniaraat, uuttuisarfeeqqallu umiarsuit sukkut ingerlatinneqartarnissaannut paasiniaaffiusut.
Kinamiut Sullualukkut umiartortarusullutik nalunaarutigereerpaat. Sullualukkoorlutillu Davis Strædemukarsinnaallutillu allanut imartanukarsinnaapput.
