Borgmesterit pingasut mittarfinnut pilersaarutinut nangaasoqarneranik isornartorsiuisut

Borgmesterit pingasut tassaasut, Palle Jeremiassen, Siumut, Kista P Isaksen, Siumut, aamma Asii Chemnitz Narup IA, mittarfinnut pilersaarutinut nangaassuteqartoqarneranut isornartorsiuteqarput.

- Nunatsinni angallannikkut attaveqaatit pitsaanerusut pisariaqartinneqarnerat misissuinerpassuit takutittareerpaat, Inatsisartunilu amerlanerussuteqarluinnartut siusinnerusukkut tapersersuinerminnik takutitsisareerput. Taamaammat qinikkat ataasiakkaat namminneq soqutigisatik pillugit aalajangiinissanik pisariaqarluinnartunik kinguarsaalernerat takullugu nikalluallannanngitsuunngilaq, Avannaata Kommuniani borgmesteri, Palle Jerimiassen oqarpoq.

Kommuneqarfik Sermersuumi borgmesterip Asii Chemnitz Narupip, Naalakkersuisoqatigiit mittarfiit takissusissaat pillugit isumaqatigiinnginnerannik siusunnersukkut isornartorsiusareerpoq, maannalu isornartorsiuinini  itisilerneruaa.

 - Nuummiinnaq namminersorlutik aningaasaliisartut milliardit sinnerlugit aningaasaliisimapput, mittarfiillu sanaartorneqanngippata aningaasaliinissaraluit maangaannartinneqassapput. Taamaattoqassappat suliffiit nutaat 400 annaassavavut, Kommuneqarfik Sermersuup borgmesteria Asii Chemnitz Narup tusagassiuutinut nalunaarummi taama allappoq.

AAMMA ATUARUK Aningaasaliisussarsiornermik tamarmik unitsikkallarneqartut

Kommune Kujallermi borgmesteri Kista P. Isaksen isumaqarpoq,  
qinikkat mittarfiliornissamut pilersaarutinut nalornisitsilersut kommunimi siunissaa pillugu assorsuaq nalorninartorsiortitsilersinnaasut.

- Angallannerup aalaakaannginnera billetsillu akisunerujussuat pissutigalugit amerlaqisut kommunitsinnut nuunngitsoortarput, taamaaqataanillu inuussutissarsiutinik ingerlatsisortavut attaveqaatit pitsaannginnerannit angallassisinnaanerullu amigarneranit atugarliortitaaqaat, Kista P. Isaksen oqarpoq, nangilluni: 

- Inuerukkiartorneq unitsinneqassappat inuussutissarsiornerullu ineriartornera ilorraap tungaanut saatsinneqassappat Inatsisartut iliuuseqarnissaannut tassa massakkut piffissanngorpoq, Kommune Kujallermi borgmesteri tusagassiuutinut nalunaarummi taama allappoq.

AAMMA ATUARUK Løkke mittarfiit pillugit itigartitsisinnaatitaasoq

AAMMA ATUARUK Danskit mittarfinnut aningaasaliinissaanut periarfissat Kielsenip Løkkellu misissorniarpaat