Mittarfiit: Aningaasaliisussarsiornermik tamarmik unitsikkallarneqartut
Nuummi, Ilulissani Qaqortumilu mittarfinnik sanaartornissamut suliariumannittussarsiuussineq kisimi kinguartinneqanngilaq.
Mittarfinnulli pingasunut pilersaarutinik piviusunngortitseqataasinnaasunik aningaasaliisussarsiorneq aamma unitsikkallarneqarpoq, Kalaallit Airportsip siulersuisuini siulittaasoq, Johannus Egholm Hansen KNR-imut oqarpoq.
AAMMA ATUARUK Sanaartornermi suliassat neqeroortitsivigineqarnissaa Kalaallit Airportsip kinguartikkallarpaa
Mittarfiit qanoq takitiginissaasa politikkikkut isumaqatigiissutigineqanngikkallarneranni aningaasat atorneqartussat annertussusissaat qularnangaatsiarpoq.
- Suut aningaasaliiffigineqassanersut erseqqinngitsillugu atorniarniarneq isumassaqarpallaanngilaq, Johannus Egholm Hansen oqarpoq.
Avataanit aningaasaliisussarsiornerup juunip qaammataani aallartilluarsimanissaa pilersaarutaagaluarpoq.
Nuummi mittarfiup 2.200 meterisut takitiginani, 1.199 meteriunissaanik Partii Naleqqap misissueqqissaartitsiniarnera pissutigalugu Kalaallit Airportsip aningaasaliisussarsiornissaq kinguartikkallartariaqarpaa.
AAMMA ATUARUK Kielsenip Løkkellu Nuummi mittarfik takinerusoq qulakkeertariaqarpaat
Tamatuma saniatigut Naalakkersuisut danskillu naalakkersuisuisa danskit aningaasaliisartuisa mittarfinnut pilersaarutinut aningaasaliisinnaanerat oqallisigimmassuk, taarsigassarsinissamutaningaasat annertussusissaat aamma nalunarsivoq.
Kalaallit Airports A/S-illi naalakkersuisoqatigiinni pilersaarutit pillugit politikkikkut isumaqatigiissuteqartoqarsinnaalernissaata tungaanut, aningaasanik atorniarfigineqarsinnaasut assigiinngitsut misissuiffigeqqissaassavai.
- Pilersaarutit piffissaliussallu nassuiaasiorsimatinnagit avataaniit pisussaaffilersuisussamik aningaasaliisoqarsinnaanngilaq, Johannus Egholm Hansen oqarpoq.
Ingerlatseqatigiiffiit arlallit neqerooruteqarniarunnaarsinnaasut
Danskit sanaartugassanik suliassinneqartartui, Per Aarsleff A/S islandimiut Istak peqatigalugu mittarfinnut neqeroortitsiniarnermit tunuarniarlutik juunimi aalajangerput. Ingerlatseqatigiiffiit sanaartornissamut neqerooruteqarsinnaanermut akuerineqartunut arfinilinnut ilaagaluarput.
AAMMA ATUARUK Per Aarsleff A/S suliariumannittussarsiuussinermit tunuartoq
Ingerlatseqatigiiffiillu neqerooruteqarsinnaasut allat tallimat tunuarnissamik eqqarsaateqarsinnaanerat mattunneqarsinnaanngilaq. Europammi avataani sanaartornermik ingerlatsisoqarlualeruttorpoq, sanaartugassanillusuliassinneqartartut neqeroorfigisinnaasarpassuaqarlutik.
Nunatsinni mittarfinnik sanaartornissat kinguartinneqassappata ingerlatseqatigiiffiit piukkunnarluartut piffissaaruteratarsinnaapput.
- Arlaata tunuarniarnissaanut tunngaviusinnaasumikeqqaasaqarsinnaanngilanga. Illuatungaanili aamma nalunngilarput taamaaliortoqaratarsinnaasoq. Tamannalu pilersaarutit annertussusissaat piffissalerneqarnissaallu erseqqissitinnagu piffissap ingerlanerani aarlerinarneruleriartussaaq, Johannes Egholm Hansen oqarpoq.
