Sanaartornermi suliassat neqeroortitsivigineqarnissaa Kalaallit Airportsip kinguartikkallarpaa
- Nuummi aamma Ilulissani mittarfissanut sanaartornermi suliassat neqeroortitsivigineqarnissaannut, sanaartornermut inatsimmut tunngatillugu politikkikkut paasinarsisitsinissaq utaqqineqartariaqarpoq, mittarfinnut ingerlatseqatigiiffimmi siulersuisut taama oqarput.
Ilulissani Nuummilu mittarfissanut sanaartornermi suliassat neqeroortitsivigineqarnissaat pilersaarutigineqartoq kinguartikkallarniarlugu, Kalaallit Airportsimi siulersuisut ippassaq sisamanngornermi ataatsimiinnerminni aalajangerpaat.
AAMMA ATUARUK Neqeroortitsinissaq kinguartinneqarsinnaavoq
- Neqeroortitsinissap kinguartikkallarneqarnissaa pillugu aalajangerneq Naalakkersuisut paaseqatigilluarlugit pivoq, aammalu illuatungeriit neqeroortitsinissamut tunngavissat pisariaqartumik paasinarsisinneqarnissaannut periarfissaqartitsinissaq siunertarineqarluni, siulersuisut siulittaasuat Johannes Egholm Hansen oqarpoq, nangillunilu:
- Kalaallit Airports-ip sanaartornermut inatsisissatut siunnersuutip Aningaasaqarnermut Akileraartarnermullu Ataatsimiititaliami suliarineqarnerata ingerlaqqinnissaa qilanaaraa, aammalu Inatsisartunut, Ataatsimiititaliamut aamma Naalakkersuisunut, taakkua inatsisissatut siunnersuummik suliarinninnerisa nalaanni, suli tamakkiisumik piareersimassalluni, Johannes Egholm Hansen oqarpoq.
AAMMA ATUARUK Mittarfiit sanaartornissaannut inatsisissaq ukiaru oqaluuserineqassaaq
Kalaallit Airportsimi pisortaaneq Steffen Ulrich-Lynge paasissutissiivoq, Ilulissani aamma Nuummi mittarfinnik sanaartornissaq pillugu neqeroortitsinissamut, entreprenørinut maajip qaammataani piukkunnartussarsiuussinermi piukkunneqartunut nassiussisoqartussanngoraluartoq, taamaalilluni taakkua aasap ingerlanerani suliarinnissinnaassagaluarlutik.
