Kalallit Airports: Neqeroortitsinissaq kinguartinneqarsinnaavoq
Nuummi, Ilulissani Qaqortumilu mittarfinnik nutaanik sanaartortitsinissaq pillugu neqeroortitsinissamut Kalaallit Airports piareersimavoq, neqeroortitsinissarli kinguartinneqassanersoq ingerlatseqatigiiffiup siulersuisuisa maanna oqaluuserisussanngorpaat, Inatsisartuni ataasinngormat oqallittoqarnerata kingunerisaanik mittarfiit qanoq takissuseqassanersut nalornissutigineqalermat.
- Uanga nammineq isumaga malillugu - siulersuisut tamaasa sinnerlugit oqaaseqanngilanga - uanga nammineq isumaga malillugu 2200 meterinut neqeroortitsinissaq siunertaqarnavianngilaq Inatsisartut kingusinnerusukkut aalajangissappata suliniutigineqartussaq allaanerussasoq, Kalaallit Airportsimi siulersuisuni siulittaasoq, Johannus Egholm Hansen, taama oqarpoq.
AAMMA ATUARUK Mittarfissat naafferarlugit sanasigit
Taassuma oqaatigaa Kalaallit Airportsip siulersuisui sisamanngorpat ataatsimiinniartut, siulersuisullu tamatumani aalajangiiffigissavaat mittarfiit nutaat pingasut sanaartorneqarnissaannut neqeroortitsinissaq kinguartinneqartariaqassanersoq.
Siulersuisuni siulittaasoq naapertorlugu Kalaallit Airports 2018-imut aningaasanut inatsit Inatsisartut ukiaanerani ataatsimiinneranni akuersissutigineqartoq aqqutigalugu neqeroortitsinissaminut piginnaatinneqarpoq, suliniutinilu toqqammavigineqartut nalornissutigineqalersimanngikkaluarpata ingerlatseqatigiiffik neqeroortitsinissaminut piareersimagaluartoq:
- Mittarfiit takissusissaat allat eqqartulissagutsigit, allaanerusullu akuersissutigineqassappata, taava pilersaarusiorneq aallaqqaataaneertariaqassavarput, Johannus Egholm Hansen oqarpoq.
AAMMA ATUARUK Mittarfiliorneq pioreersunilluunniit atuiinnarneq aningaasaqarnermut assigiippoq
Siulersuisuni siulittaasoq naapertorlugu tamanna neqeroortitsinissamik nutaamik suliaqarnissamut tunngatillugu ukioq ataaseq sinnerlugu kinguaattoornermik kinguneqassaaq.
Aamma nassuiaavoq mittarfiit takissusissaat Inatsisartunit 2015-imi akuersissutigineqartut tunngavigalugit Kalaallit Airports sulisimasoq.
Partiip naalakkersuisooqataasup Partii Naleqqap oqaaseqartartuata Jens Napaattuup mittarfiit pingasut pillugit inatsisissap siullermeerneqarnerani siunnersuutigaa ataatsimiititaliap inatsimmik suliaqaqqittussap mittarfinnik pilersaarutaasumit naannerusunik sanaartortitsinermi kingunerisassat misissussagai.
