Siunnersuisoqatigiit: Mittarfissat naafferarlugit sanasigit
Taama nalilipput Aningaasaqarnermut Siunnersuisoqatigiit Aningaasaqarnermut Naalakkersuisoqarfimmut allakkiaminni
Mittarfiit suliarineqarnissaannut aningaasarpassuarnik aningaaliisoqassaaq taamaattumillu mianernartortaqarluni.
Mittarfiit suliarineqarnissaannut qaniinnerusoq eqqarsaatigalugu naatsorsuutigisamit akisunerusinnaapput.
Sinneqartoorutit amerlanersaat mittarfiit sanaartorneqarnerinut atorneqartussanngussapput allanut atorneqarsinnaajunnaarlutik.
Aningasarsiorneq ajornerulerpat amigartoorutit matussuserneqarnissaat ajornakusuussalluni.
Aningaasaqarnermut Siunnersuisoqatigiit oqarnerat naapertorlugu, mittarfiit suliarineqarnerat ataatsikkut pinngippata tamanna ajortunik kinguneqannginnissaa qulakkeerneqassaaq.
- Taamaaliornikut sanaartornerup iluanaarutaasa amerlanersaasa ilaat iluaqutigineqarsinnaapput ingerlatsinermullu atorneqarlutik, sanaartornermi aningaasartuutit amerlanersaat atorneqarlersinnagit, Aningaasaqarnermut Siunnersuisoqatigiit taama allapput.
Mittarfiit ataasikkaarlugit suliarigaanni, sanaartugaq siulleq ilikkagaqarfigineqarsinnaavoq tulliata suliarineqarnissa pitinnagu.
Mittarfiit suliarineqarnerisa ataatsikkut pinnginissaat isumassarsiatsialaasoq, Randi Vestergaard Evaldsen Demokraatineersoq aamma Partiip Naleqqap siulittasua Hans Enoksen kiisalu aningaasaqarnermut naalakkersuisuusimasoq Aqqaluaq B. Egede siorna oqarput.
AAMMA ATUARUK Mittarfiliorneq pioreersunilluunniit atuiinnarneq aningaasaqarnermut assigiippoq
Taakkua siorna taama oqarput, mittarfiit suliarineqarnissaannut nunat allamiut sulisorineqarnissaat pillugit oqallittoqarnerani.
Mittarfiit marluk tallineqarnissaannut nutaamillu mittarfiliornissamut kalaallinik naammattunik sulisussaqarnissaata ajornakusoortussaanera tunngavilersuutigineqarpoq.
Qaqortumi naannerusumik mittarfiliortoqarsinnaanera Aningaasaqarnermut Siunnersuisoqatigiit periarfissatut taavaat.
Mittarfiit suliarineqarnissaannut missingersuutini periarfissaqarnerussammat, Aningaasaqarnermut Siunnersuisoqatigiit Aningaasaqarnermut Naalakkersuisoqarfimmut allakkiaminni taama allapput.
- Naannerusumik mittarfiliortoqarpat, politikerit angallannermut pisariaqartitaat anguneqassaaq, sanaartornermullu aningaasartuutit ikinnerungaassallutik, Aningaasaqarnermut Siunnersuisoqatigiit taama isumaqarput.
AAMMA ATUARUK Nalinginnaasumik isumaqatigiinneq ajortut mittarfiit tulleriaarlugit sanaartorniaraat
