Inatsisartut Mittarfiit sanaartornissaannut inatsisissaq ukiaru oqaluuserineqassaaq

Nuummi, Ilulissani Qaqortumilu nutaanik mittarfiliortiternerup aningaasalersornissaanut, ingerlatsinissamut sanaartornissamullu inatsisissatut siunnersuut siullermeerlugu inatsisartuni oqaluuserineqarnera ataasinngornermi unnukkut naammassineqarpoq. 

Siunnersuutip oqaluuserineqarnerani  isumaqatigiissutigineqarpoq,  inatsisissatut siunnersut annertooq, ukiamut inatsisartut ataatsimiinneranni inaarutaasumik suliarineqassasoq. 

Tassunnga ilanngullugu oqaatigineqarpoq, inatsisartut aningaasaqarnermut akileraartarnermullu ataatsimiititaliata nammineq aalajangissavaa, siunnersuutip suliarineqarnera qaqugu naammassineqassanersoq inatsisartunilu suliarineqarnissaannut piareernersoq. 

Mittarfiit sanaartorneqarnissaannut  taakkualu aningaasalersorneqarnissaannut siunnersuutip aappassaanerlugu inaarutaasumillu pingajussaaneerneqarnissaa pillugu inatsisartut ataatsimiinneranni ullup ingerlanerani  aassigiinngitsunik nalunaaruteqartoqartarpoq. 

Partiit oqaaseqartartuisa saqqummiussineranni Siumumit taakkualu naalakkersuisoqataannit nalunaarutigineqaraluarpoq,  inatsisissatut siunnersuut  inaarutaasumik suliarineqassasoq sapaatit akunneri tallimat qaanngiuppata tassalu juulip qaamaataata naalernerani.   

Taama nalunaaruteqarneq illuttungiliuttut partiivinit pingasunit tassalu, Inuiaqatigiinnit, Demokraatinit kiisalu Suleqatigiissitsisunit isornartorsiorneqarpoq.

Partiit pingasuullutik isumaqarput, nukingerpallaartoqarpoq,  apeqquterpassuillu suli akissutissarsineqannigtsut  misissorneqartariaqartut. 

Ataasinngornermi unnulersoq inatsisartut ataatsimiinnertik unitsikkallarpaat. Minutsillu 40-it qaangiummata  Karl Kristian Krusep nalunaarutigaa, Siumumit isumaqatiginartinneqartoq ataatsimiititaliay attuumassuteqartut siunnersuutip  aappaasaaneerlugulu pingajussaaneernissaa aalajangersinnaagaa. 

Inatsisartut Siulittaasuata nalunaarutigaa, inatsisissatut siunnersuut inatsisartut ukiakkut ataatsimiineranni  inaarutaasumik suliarineqarumaartoq inatsisartunilu ilaasortat naalakkersuisullu aasarsiorluarnissaannik kissaallugit.  

Inatsisissaatut siunnersuut inatsisartuni  aapassaaneerlugulu pingajussaaneerneqartinnagu, inatsisartut aningaasaqarnermut akileraartarnermullu atatsimiititaliaani suliarineqartussanngortinneqarpoq.
Inatsisartut ukiakkut ataatsimiinnerat 28 september aallartissaaq.