Inuussutissarsiutit

Mittarfiit: Per Aarsleff A/S suliariumannittussarsiuussinermit tunuartoq

Ilulissani, Nuummi Qaqortumilu mittarfinnik nutaanik sanaartortitsinissamut ingerlatseqatigiiffiit piukkunnartussarsiuussinermi toqqarneqartut arfinillit ilaat ataaseq Kalaallit Airportsip annaavaa. Sermitsiami sapaatit akunneranni matumani saqqummersumi tamanna allaaserineqarpoq.

Allattoq Inge S. Rasmussen

juunip 08-at 2018 09:40

Nutserisoq Simon Uldum

Ingerlatseqatigiiffik Per Aarsleff A/S Islandimi suliffeqarfik Istak peqatigalugu mittarfinnik nutaanik sanaartornissamut suliariumannittussarsiuussineq peqataaffiginiarunnaarpaa. Aviisilu naapertorlugu ingerlatseqatigiiffiup taama aalajangernini itisiliiffigerusunngilaa.

AAMMA ATUARUK Sanaartornermi suliassat neqeroortitsivigineqarnissaa Kalaallit Airportsip kinguartikkallarpaa

Sanaartugassanik suliarinnittartup peqataaniarunnaarneratigut allamik toqqaasoqassanngitsoq, siulersuisuni siulittaasup Johannus Egholm Hansenip Sermitsiamut ilisimatitsissutigaa.

Inatsisartut sapaatit akunnerata siuliani oqallinneranni Partii Naleraq sammisamik nutaamik saqqummiussaqarpoq. Nuummi Ilulissanilu mittarfiliassat takissusissaattut meterit 2200-t akuersissutigineqarsimasut pinnagit mittarfinnik meterinik 1199-nik takissusilinnik sanaartornikkut sunniutissat naliliiffigineqarnissaat partiip piumasaraa.

AAMMA ATUARUK Mittarfiliornissamut sanaartortussat toqqarneqartut

Mittarfiillu takissusissaasa nalornissutigineqalernerat ingerlariaqqinnissaq pillugu aamma nalornisitsilerpoq, taamaammat Kalaallit Airportsip siunnersortini Danske Bank ullumi tallimanngornermi ataatsimeeqatigissavaa. Illuatungeriillu ingerlariaqqinnissaq ataatsimiinnermi oqaluuseriniaraat, Sermitsiaq taama allaaserisaqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Mittarfiit: Per Aarsleff A/S suliariumannittussarsiuussinermit tunuartoq

Aamma atuaruk