Løkke mittarfiit pillugit itigartitsisinnaatitaasoq

Ilisimatusarfimmi kulturimik, oqaatsinik oqaluttuarisaanermillu immikkoortortaqarfimmi adjunktiusimasoq, oqaluttuarisaanermillu ilisimatooq, Jens Wendel-Hansen taama naliliivoq.

- Lars Løkke Rasmussen itigartitsisinnaatitaasoq aamma oqaatigineqarsinnaavoq, Jens Wendel-Hansen oqarpoq.

Nunarpulli mittarfinnut pilersaarutinut atatillugu namminerluinnaq suleqatissarsiorsinnaasoq, Naalakkersuisut siulittaasuata, Kim Kielsenip KNR-imut aalajangiusimallugu oqaatigaa.

Aamma naak NAmminersorlutik Oqartussani atorfikkaat mittarfiit sanaartornissaannut danskinik aningaasaliisussarsiorsinnaaneq pillugu danskit naalakkersuisui oqaloqatigileruttoraluaraat.

Kielsenip mailikkut KNR-imut ilisimatitsissutigaa ’oqaloqatiginninneq nunat akornanni oqartussaaffiit agguataarnerata ataqqineqarneratigut’ ingerlassasoq.

AAMMA ATUARUK Danskit mittarfinnut aningaasaliinissaanut periarfissat Kielsenip Løkkellu misissorniarpaat

Nunarpulli Danmarkillu pinngitsaaliissutaanngitsumik aaqqiissutissarsisinnaanngippata, Danmarkip mittarfinnut pilersaarutinut sunniuteqarnissamik piumasaqaateqarsinnaaneranik paasititsisimannginnerarpaa.

- Eqqaaneqanngilaq, qaninnerusumik suleqatigiinnissaq pillugu oqaloqatigiinnermik oqallisiginninnermillu allartitsereernerput eqqarsaatigigaanni, apeqqutaaratartussatut ilimanarpallaanngitsoq sioqqullugu akissutissarsinissaa isumaqanngitsoq, Kielsen akissuteqarpoq.

Suliaq nunatsinnit aatsitassanik qaqutigoortunik soorlu Uranimik avammut tunisaqartarnissaq pillugu Danmarkimut 2015-2016-imi oqaloqatigiissutigineqarnermut sanilliunneqarsinnaasoq, Aalborgip Universitetiani Issittumi kulturi politikkilu pillugit lektori, Ulrik Pram Gad isumaqarpoq.

Suliaq taanna Danmarkimi inuussutissarsiornermik aqutsisoqarfik nunatta aatsitassanik qaqutigoortunik sumut tuniniaasinnaaneranik aalajangiinissamut kingullertut oqaaseqartussanngorneranik inerneqarpoq.

- Apeqqummut tassunga aaqqiissutigineqarpoq, Kalaallit Nunaata danskit saqqummiussaannik akuersineranik inerneqarpoq: Tassa Danmark sillimaniarnermut tunngasunik isiginiagassaqarpoq - erseqqissuliaanngitsunik sulisaatsimili. Taamaammat Kalaallit Nunaata Danmarkip malittarisassanik paasinninnera  akuerissaneraa apeqqutaavoq.

Aalborgip Universitetianiit Ulrik Pram Gad oqarpoq.

AAMMA ATUARUK Kinamiut sanaartugassinneqarnissaat Løkkep ernummatigigai