Kalaallit Airports: Kinap soqutiginninneranut ernumaneq ingattarserneruvoq

Kinamiut ingerlatseqatigiiffiata China Communication Construction Companyp Nuummi, Ilulissani Qaqortumilu mittarfinnik sanaartortuunissaa danskit naalakkersuisuisa Illersornissaqarfiullu isertortumik paasiniaasartuisa qaammatini kingullerni mianersoqqussutigaat.

Tamannali Kalaallit Airportsip ingerlavigisaanut sunniuteqanngitsoq, siulersuisut siulittaasuata, Johannnus Egholm Hansenip oqaatigaa.

- Qunussutiginngilagut. Illersornissarlu pillugu politikkimut qanoq ataqatigiinnera takujuminaatsippara.

AAMMA ATUARUK Aningaasaliisussarsiornermik tamarmik unitsikkallarneqartut

Kalaallit Airportsip ingerlatseqatigiiffik toqqagaa mittarfinni pingasuni tikittarfinnik miffissanillu sanaartortussaavoq. Mittarfiillu ingerlanneqarnerat tamarmi Kalaallit Airportsip isumagissavaa. Taamaammat kinamiut ingerlatseqatigiiffiisa ernumassutigineqarnerat siulersuisut siulittaasuata ingattarsernertut isigaa.

- Mittarfiit sanaartornerisa saniatigut allanik ilanngussisussaanngillat. Taamaammat kinamiut sunniuteqarnissaat ernumassutissartaqartinngilara.

Aamma danskit naalakkersuisuisa Illersornissaqarfiullu isertortumik paasiniaasartuisa kinamiut mittarfinnik sanaartortinneqartussatut toqqarneqarnissaat ’nunanut allanut sillimaniarnermullu politikkimut sunniuteqassaneraraluaraat’, Johannus Egholm Hansen eqqissisimaneruvoq.

- Namminersornermut inatsimmi allassimavoq danskit naalagaaffiat akuliutissaguni taava inatsisitigut tunngaveqassaaq.Uanilu sumik tunngaveqassanersoq takusinnaanngilara.

AAMMA ATUARUK Sinneqartoorutit qanoq piniarnerigut oqaatigisinnaanngikkallarpara

Mittarfinnullu pilersaarutinut tunngatillugu aningaasaliisussarsiorneq mittarfiit takissusissaasa politikkikkut isumaqatigiissutigineqalernissaata tungaanut unitsikkallarneqartoq, Kalaallit Airportsip KNR-imut paasissutissiissutigaa.

AAMMA ATUARUK Kalaallit Nunaata Kina paarissavaa