Broberg: Sinneqartoorutit qanoq piniarnerigut oqaatigisinnaanngikkallarpara
Aningaasaqarnermut Naalakkersuisup nunatta karsiani 2017-imi sinneqartooruteqarnerit Naalakkersuisut akuersissuteqarfigineqarnerattut, Kalaallit Airportsimut atorneqassanersut suli oqaatigisinnaanngilaa.
Nunatta karsia 2017-imi naatsorsuutiginngisamik 204 millionit koruuninik sinneqartooruteqarpoq. Naalakkersuisut 2018-imut aningaasanut inatsit aqqutigalugu nunatta karsiata 2016-imi, 2017-imi, 2018-imi 2019-imilu sinneqartoorutai Kalaallit Airportsimut aningaasaliissutigisinnaanissaat pisinnaatitaaffigaat.
Qaqortumi, Ilulissani Nuummilu mittarfinnut pilersaarutinut akiliuteqarnissamut aningaasat siuariaataangaatsiarsinnaapput.
AAMMA ATUARUK Nunatta karsiata amigartooruteqarnera taamaalilluni sinneqartooruteqarfiulerpoq
Aningaasat sumut atorneqarnissaat suli aalajangerneqanngitsoq, Aningaasaqarnermut Naalakkersuisup, Pele Brobergip pingasunngornermi marlunngornermi radioaviiseqarnerani oqaatigaa.
Politikkikkut isumaqatiginninniutigineqassasut
Naalakkersuisuni sinneqartooruteqangaatsiarpusi, Aningaasaqarnermut inatsit atorlugu sinneqartoorutisi Kalaallit Airportsimut atorneqassappat?
Maannakkut tusagassiuutitigut isumaqatiginninniarnerit ingerlanneq ajorakkit oqarsinnaanngilanga massakkorluinnaq qanoq piniarnerigut. Kisianni qiviarutsigut isertitaqarnerusimaneq taavalu atuinikinnerusimaneq sinneqartoortitsisoq. Taanna sanilliutissagaanni aningaasartuutit ingerlatsinermut 2016-imut sanilliutissagaanni qaffakkiartorsimaneri tutsuiginarpallanngillat. Taamaammat qulakkeerisussaavugut aningaasartuutigut aqulluarnissaat massakkut ingerlalluarnitsinni, Pele Broberg oqarpoq.
Aningaasarpassuarnik sinneqartoorpusi, mittarfiliortiternissamullu aningaasartuuteqangaatsiartussaallusi. Aningaasanik ikinnernik attartornissamut tamanna aqqutissiuussinngila?
Tassa soorlu aatsaaginnaq oqartunga tusagassiutitigut isumaqatigiinniarnerit soorunami ingerlattussaanngilagut, kisianni qularnanngilaq pitsaanerpaamik inuiaqatigiit sullinnissaat anguniartussaagatsigu sinneqartooraluaraanni imaannginnami atuinnagassat kisianni qulakkeerissutaasussaagamik inuiaqatigiit siunissaannut.
Ukiut ingerlalluarfiunngitsut piareersarfigineqassapput
Ingerlatsinermut aningaasartuutit amerleriarsimaneri killormut saatinnissaannut qanoriliuuteqarsinnaavisi?
Tassa qularnanngilaq sinneqartoorutit ukua ataasiakkuutaat ukiut tamaasa isertittarnavianngilagut, ataasiaannarlunilu ukiumut nunatta karsia naammassisarparput, taamaasillutalu ukiut ingerlalluarfiusut tamatigut piareersarfigisassavagut, ukiut ingerlalluarfiunngitsut. Taamaammat sumut atussanerigut massakkut toqqaannaq uanga aalajangigassarinngilara, kisianni aappaagu aningaasaqarnermut inatsimmut siunnersuuteqartussaavugut, tassanilu pingaaruteqartorujuuvoq uagut patajaatsumik ingerlatsinissarput qulakkeerniarlugu, aamma aningaasartuutit isertitsiviusinnaasut taakku pingaarnersiorfigissallugit.
AAMMA ATUARUK Nunatta karsiata 2017-imut naatsorsuutai sinneqartoorfiusut
