Isertortumik paasiniaasartut: Kalaallit Nunaata Kina paarissavaa

Illersornissaqarfiup isertortumik paasiniaasartuisa pisortaat, Lars Findsen mianersoqqussuteqartuuvoq. Taassuma nunarput illuatungeriit akornanni naligiissutsit nikingarujussualerneraniilernissaa aarlerinartoqarnerarpaa.

- Aningaasaliisoqarnissaa ajunngilaq. Illuatungeqarsinnaavorli aamma tassani allanut atanermi maleruniinnartariaqarnermi, illuatungeriilli akornanni naligiinngitsoqarujussuarnerani piffissami ungasinnerusumi naleqqutinngitsoqalersinnaalluni, Lars Findsen oqarpoq.

Kina arlaleriarluni nunatsinnut soqutiginnittarpoq, soqutiginninnerlu illugiinniippoq. Naalakkersuisunut ilaasortat sisamat ukiaq Kinami inuussutissarsiuteqarnermi tuniniagassanik pilerisaarisoqarnerani peqataapput.

AAMMA ATUARUK Kina nakkutigaarput

Inuussutissarsiuteqarnermut naalakkersuisuusimasup, Hans Enoksenip kinamiut aningaasaliisartui EXIM tamanna ilutigalugu ataatsimeeqatigai. Ataatsimiinnermi kinamiut mittarfinnut nutaanut 4 milliardit missaannik naleqartunut aningaasaleeqataasinnaaneranut periarfissat oqallisigineqarput.

Hans Enoksen ataatsimeereernermi oqaaseqarpoq:

- Ataatsimiinnerit kingorna neriulluarnartumik oqaaseqartarnerat assut nuannaarutigaara, neriuppungalu unammillerutaalluarsinnaasunik suliarinnittussarsiulerutta neqerooruteqarumaartut. Sanaartornermi aningaasaliinissamilu aningaasartuutissat sapinngisamik appasissuutinnissaat siunertaraarput, Hans Enoksen ataatsimeereernerup kingorna oqarpoq.

AAMMA ATUARUK Naalakkersuisut Business Class atorlugu angalaqatigiinnerat 397.000 koruuneqartoq

Kinamiulli suliffeqarfiutaata nunatsinni aningaasaliisinnissaat aarlerinartortaqanngitsuunngilaq. Lars Findsen naapertorlugu kinamiut suliffeqarfiutai aningaasaliiniaraangamik kinap naalagaaffiata suut soqutiginerai aallaavigisarpaat, taamaammat namminermut niuernerpalaarnerillu immikkoortinneqarsinnaanngitsut, naalagaaffiup isertortumik paasiniaasartuisa oqaatigaat.

Lars Findsen kinamiut nunatsinni sulerinerat nakkutigalugu ilisimatitsissutigaa, nunarpummi taakku akisussaaffianut ilaammat.